Sawrkar ruahman – huapzo damlo enkawlna tura ruahmanna inhrilh

Mizoram sawrkarin mipui huapzo damlo enkawlna – Universal Health Care kalpui a tumnaah Health minister Lalrinpuii hoin Thawhtanni khan sawrkar thuneitute leh Non-Government Hospital Association Mizoram (NGHAM) hruaitute an inkawm.
Mizoram Health Care Society CEO Dr Biakthansangi chuan ‘mipui huapzo health care’ duan dan a sawifiah a. Mipui tana man chawi loa damdawi in awm (cashless) kalpui a nih theihna atana sawrkar inbuatsaih dan a sawi bawk.
NGHAM president Lalrintluanga Jahau chuan health care kalpui dan tur leh a ngelnghet theih dan turah ruahmanna tha awm se a duh tih a sawi a. Tunhma lama health care hlawhchham tawhnaah Mizorama private hospital-te chuan sum tam tak an lo hloh tawh avangin, hetiang a thlen nawn loh nan ruahmanna tha awm se an duh tih a sawi a ni.
Health minister tawiawmtu adviser to CM (Finance) TBC Lalvenchhunga chuan package system kalpui dan tur, premium hrang hrang siam tum dan, payment mode leh fund flow chungchanga sawrkar inbuatsaih dan a sawifiah a. Sawrkarah rinna nghat ngam turin NGHAM hi a ngen a. Adviser to CM (Handholding) KC Malsawmzauva pawhin system mumal neiin, hlawhtling taka health care kalpui a nih theihnan NGHAM chu tanrual puiah a sawm a ni.