Sawrkar thar.. kalphung thar…

Mizoram Legislative Assembly General Election 2023 result chu niminah puan fel niin, kalphung thar tiamtu ZPM party chu hneh takin an tling a. State kan nih hnu kum 35 chhung party pahnih inlal chhawkna hnuaia kun thin Zoram mipuite hian, sawrkar thar kaihhruaina hnuaia kun an duh ve tawh tih an lantir a ni ber awm e.
Party pahnih sawrkarte khan theihtawp chu an chhuah ve thin a, tih that tam tak an nei a, tih that loh pawh tam tak an nei ang; hmasawnna tha tak tak pawh Mizoram hian a lo neih phah tawh. Chutih laiin, mipuiin duhkhawplohna an nei a, chu an duhkhawplohna phuhru theitu a nih beiseiin ZPM hi an thlang ta tiin a sawi theih bawk ang.
Kalphung thar an zuar bawk a, result atang hian Mizoram kalphung thar a intan nghal der a tih theih awm e. Kum sawm dana sawrkar inthlak tur anga ngaihna kha ZPM hian a rawn chawk chhia a. Sawrkar hmasaain inthlana sawrkar hmasa a hnehna aia sangin ZPM hian an rawn hneh thei nghal a. He inthlana thil thar mak danglam tak pakhat leh chu, party pakhat atanga MLA tling thar, first timer thiau sawrkarna siam thei thuak khawp an tling pha hi a ni. Hei bakah hian, kum 35 hnu lama inthlanpui hmachhawna hmeichhe tlin leh hmasak berna a ni a, tum khatah hmeichhe MLA pathum an tling rual thawt thei hi, engmah women reservation pawh awm lo a nih avangin, Mizoram political history-ah chhinchhiahtlak leh hriatreng tlak a ni tawh ang. Hei bakah hian kum 40 hnuai lam, mi pathum an tel bawk a, thalaite era intanna rahbi hmasa a ni thei bawkin a rinawm.
Election campaign laiin kalphung thar an zuar nasa a, ‘ro min rel tir ve ula, term khat chhunga kan hnathawh dan in duhkhawp loh chuan inthlan leh hunah min paih leh mai dawn nia’ ti khawpa mipui hnena inzuar ngam an ni a, mipuiin beiseina sang tak nen sawrkar thar hi an thlir ta thup a ni ber a. Chutih rualin, vawilehkhata thil fel nghal duak duak tur erawh chuan beisei theih an ni lovang tih erawh a hriat awm e.
Inthlana tlin dan leh tlak dan pawh kan politician-te hian an thiam ta hle. Kalphung thar hnuaiah hmasawnna thar tha tak thawk chhuak turin, sawrkar thar lawmpuina leh duhsakna kan hlan e.