Sawrkar tharah BJP tel dawn chiang – Lalrinliana Sailo

MNF leh MLA a nihna atanga bang ta, Mizoram Assembly speaker kalchhuak tur Lalrinliana Sailo chuan Mizoram MLA inthlanah BJP chu sawrkarah a tel dawn chiang tih a sawi.
Ningania BJP-a lawmluh a nihna inkhawmah Lalrinliana Sailo chuan BJP chu Mizoramah a mala sawrkarna siam thei dinhmunah ding rih lo mah se, sawrkar siamtu ah an tel ngei dawn tih a chian thu a sawi a. Mizo mipuiin BJP chu an hmu sir he laklawh tih sawiin, Mizorama Congress party din a nih dawn pawhin ‘Vai pawl’ tih hmanga selna tam tak an hmachawn tih a sawi.
Central sawrkarah BJP chuan kum 20 chuang ro an la rel dawn nia sawiin, central sawrkar tana hling ni loa, a thawhpui sawrkar kan nih ngei a ngai, tiin, “Ka mimal hamthatna tur ni loin Mizoram ka hmangaih avangin BJP ka zawm a; central puihna in Mizoram dinhmun chhe tawh tak hi tundin ngei ka tum a ni,” a ti.
Riltam chungin ral a do theih loh tih sawiin, Mizoram chu eng dinhmunah pawh ding dawn se, economic leh infrastructure-ah nghet taka a din a ngai tih a sawi. BJP candidate-ten minister dinhmun an chan theih phawt chuan central project hrang hrangah Mizo mithiamte Board member-a an tel tur thu sawiin, ngampa taka Mizoram hmasawnna tur an hmuh zung zung theih tawh tur thu a sawi a ni.
Lengpui Airport chu Mizoram sawrkar enkawl a ni a, sum tam tak sen a ngai thin tih speaker leh minister hlui Lalrinliana Sailo hian a sawi a. BJP-in sawrkarna a chan phawt chuan central enkawl tawh tur a ni tih a sawi. Mizoram Assembly House chu India rama te ber leh chep ber a ni, tiin, Lammualah lian tha taka sak a nih tur thu a sawi bakah police duty tam tak tih tlemna turin Lammualah minister leh MLA te chenna tur hmun sak nghal vek a nih tur thu a sawi bawk.