Sawrkar tharin hmasawnna hna thawhna tur min tih lapse sak – Ramthanmawia, MLA

Sawrkar tharin hmasawnna hna
thawhna tur min tih lapse sak
– Ramthanmawia, MLA
Thil thaah chuan kan hma amite bul lo tan tawh chhunzawm sak mai a tha a, tun sawrkar tharin an bial tana hmasawnna hna thawhna tur tam sak SASCI hnuaia an thun tawh sum a tih lapse sak chu rilru a na takzet tih East Tuipui bialtu MLA Ramthanmawia chuan a sawi.
January 11 khan East Tuipui bialtu MLA hian Vanzau Public Playground a hawng a. Field puitling tha tak an neih theihna tura bul tantu, bialtu MLA hmasa Pu T Sangkunga chu chawimawi a duh a, a chungah lawmthu a sawi tih a sawi. “Sawrkar inthlak avanga kan hma amite hmachhawp kan in chhunzawm sak duh thin lo hi tha lo ka ti a. Thil thaah chuan kan hma amite bul lo tan tawh hi chhunzawm sak mai thin ila tha ka ti. Tun sawrkarin kan bial tana hmasawnna hnathawhna tur tam tak SASCI hnuaia kan thun min tih lapse sak kha rilru a na takzet a ni. A tuartu chu mipui an nih zel avangin hun kal zelah chuan chin tawh loh a tha hle in ka hria,” a ti.
Vanzau Public Playground laih zauhna tur hi bialtu MLA hian SASCI 2022- 2023 hnuaiah cheng nuai 19.4 a ruahman sak a. Field laih zauh hna hi sum sanction zaah za hman a nih theihnan contractor hnenah pe loin Vanzau VC-in an kutken a ni.
January 10 khan Vaphai to Chawngtui ‘E’ kawngpui, SASCI fund atanga black top thar chu Ramthanmawia hian hawngin, helai bialtu MLA a nih tirhin Chawngtui ‘E’ in enge a mamawh tih a ngaihtuah a, vantlang punkhawmna tur hall tha tak an mamawh tih hriain BADP atangin an sa a. A dawtah khawtlangin a mamawh nia an ngaih khaw panna kawng, a fur a thala kal theih turin SASCI hnuaiah black topping turin an thun ta tih a sawi.
Chawngtui ‘E’ kawng hi SASCI 2023- 2024 fund atanga siam niin, black topping hna hi PWD Champhai Division hnuaia thawh a ni. Black topping thui zawng hi km. 3.4 niin, hume pipe culvert pathum siam a ni. Chawngtui ‘E’ ah hian an feh kawng pawimawh Dilkawn to Thilte Fartlang Agriculture Link Road, MLA fund atanga laih chu bialtu MLA hian a hawng nghal. Heng kawng tha an neih lawmna ruai hi khawtlangin an theh a ni.
Farkawn gate siamna tur lungphum chu MLA hian a phum bawk a. Farkawn Gate hi cheng nuai 30 senna tur niin, Farkawn Heritage Preservation Society Aizawl hmalaknaa siam tur a ni.