Sawrkar thil tihthat hmu thei loin demna tur hlir an zawng – Lalthansanga

Sawrkar thil tihthat hmu thei
loin demna tur hlir an zawng
– Lalthansanga
Mi thenkhatin sawrkar thil tihthat hmu thei loin rem leh rem loin sawrkar demna tur hlir an zawng thin tih minister Lalthansanga chuan a sawi.
Thawhtannia ZPM party office-a inkhawmah Lalthansanga chuan chief minister Pu Lalduhoma chungah sawrkar laipuiin Zoram hmasawnna turin rinna an nghat a, chu chuan sawrkar laipui duhsakna tam tak kan ramah a thlen mek tih a sawi.
“Mi thenkhatin sawrkar thil tihthat hmu thei loin rem leh rem loa sawrkar demna tur hlir an zawng thin hi pawi ka ti a. Mipui tana sawrkar hmalakna chhuanawm tak tak hliahkhuh an tum thin hi polictics ramhlui zia a ni a, kan kalpelh a hun tawh hle,” a ti.
ZPM sawrkar hnuaiah dan hmangin an kal zel tih minister hian a sawi a. Sawrkar hmasa hunlai atanga dan kan lo ngaihpawimawh tawk loh avangin a chang chuan hriatthiam loh hlawh lek lek thin mah se, dan behchhanin an kal zel dawn a, chu chuan mipui rilru sukthlek pawh a dik zawngin a herrem zel an beisei tih a sawi a ni.
ZPM sawrkarin kan ram chhunga cheng hnam tenau zawkte a ngaipawimawh hle a, hnam ziarang hrang hrang leh chin dan, chawisan leh humhalh zel an tum tih sawiin, “Inngaihsak tawn hi lungrualna thlentu a ni a, Zoram chhunga hnam hrang hrang tan ZPM party hi innghahna tlak leh inpui ber a ni chho mek a, hnam tin tan hmasawnna khairual taka kalpui kan tum a ni,” a ti.