Sawrkar thupek leh mipui

Phalna nei lova lei hnuaia tui siak chhuah tuma lei verh khap a nih thu sawrkar chuan kum hnih kalta atang khan mipui hriattirna a lo chhuah tawh a. Hei hian zawm a hlawh lo tih nimina sawrkar thuchhuah chuan a tarlang a. Phalna nei lova tui verhte hi Mizoram Ground Water Act, 2023 section 29-na hmangin hrem theih an ni.
Nimin vekah, sawrkar thupek zawm duh lo Lunglei district-a Zobawk South-a mi pangate chenna in thiahsak a nih thu sawrkar thuchhuahah a lo lang leh a. Heng mite hi National Highway-54 kawngpui sial hna thawhin an chenna in a tihchhiat dawn avanga zangnadawmna pek tawh, an chenna in thiahna tur thupek ‘eviction notice’ pawh pek tawh an ni a; mahse, an chenna in hi an thiat duh lova, an insenghawi duh bawk lo niin thuchhuahah chuan tarlan a ni.
Hetiang bawk hian March ni 5, 2024 atang khan Tawipui ‘S’ khuaah in thiah niin March ni 7, 2024 khan |hualthu khuaah mi 4 chenna in thiah a lo ni tawh bawk a. Sawr kar thuchhuahin a tarlan dan chuan vawiin lamah hian Zobawk North leh Dawn khuaah chenna in pakhat ve ve thiah a ni leh dawn a ni.
Serchhip district-a Khumtung, Chhingchhip, Chhiahtlang leh Baktawng-ah te pawh January ni 31, 2024 khan hetiang hian chenna in thiah a lo ni tawh bawk a. Sawrkara thuneitu Competent Authority for Land Acquisition chuan kum 2023 July atang khan in thiat turin hriattirna hi a lo pe tawh a, insaseng duh loa sawrkar thupek zawm duh lo heti zat chenna in thiahsak ngai an awm hi Mizorama thil thleng atan a inhmeh lo hle.
Khawpui sawrkar AMC thuneihna hnuaiah pawh hian thupek zawm duh lo an awm ta fo mai a, tun aia khauh zawka dan kenkawh a nih loh chuan thuneitu lam hian harsatna an tawk zel dawn niin a lang a, chu chuan khawtlangah harsatna a thlen tel bawk. Sawrkar dan zah leh zawm tura inngen hian awmzia a neih loh chuan, sawrkar hian khawng takin dan hnuaiah a tihtur hi ti hmiah hmiah zel thin tawh se, chu chu hma kan sawn tlanna tur a nih a rinawm.