Sawrkarin a hloh?

Tun laia sawi hlawh tak Lengpui Airport chungchangah chauh pawh a ni lo a, tunhma atang tawhin, mipui hamthatna atana sum senso chungchangah, ‘sawrkarin a hloh’ tiin ram hruaitute leh politician-te hian an sawi leh mai thin a. Kawlphetha, tuilakna, supply buhfai etc. chungchangah, mipui senso tur atanga mipui phurrit chhawk zangkhaina atana sawrkarin a lo tum sem (subsidised) ve na ang hi ‘hloh’ ti zawnga sawi tur chi niin a lang lo va, hloh ni lovin tumsakna/tumpuina tih tur zawk niin a lang. Sawrkar hi sumdawngte anga a hranpaa hlep nei tura sum peipung zawnga khawsa thin a ni lo a, chuvangin sum a senral reng reng hi ‘hloh’ tih theih a ni awm lo e.
Sawrkar sum kan tih hi mipuiin ‘tax’ hrang hrang a pek tling khawm a nih avangin ‘public money’ tih a ni a. Mipui thawhkhawm heng tax tlingkhawmte hi Central sawrkar leh state sawrkarte hian kan insem (tax devolution) leh vek a. Keini a thawk chhuak tlem state hi chuan, keimahni puala kan state hmasawnna hna lian (major work) thawhna tur khawp hi tax semrualna atangin kan la dawng pha ve ngai lo niin a lang a. Kan annual budget han en pawh hian, thawktute thawh hlawh leh sawrkar department enkawlna khawp hi kan nei ve thei chauh a ni mai a; mipui mamawh zualpui kawlphetha, tui, supply buhfai leina tur sum pawh hi mipui sum thawh (tax) tlingkhawm vek a nih avangin, mipui hamthatna atana sawrkarin a hmanral hi ‘hloh’ ni lovin mipui expenditure chhawk zangkai nan athen azar a lo tumpui ve mai chauh a ni.
Hetih rual hian, ‘hloh’ tia kan sawi tur zawk chu, a nihna tur ang taka hmasawnna hna thawhna tur mipui sum hman a nih loh hian a ni. Mizoramah eirukna a hluar kan tih chuan, sawrkar/mipuiin nasa takin sum a hloh tihna a ni. Mipui buhfai leina tur tlem azawng sawrkarin a lo tum thensak hi sawrkar insawitheihna tur a ni lo. Kawlphetha hman man a then azar sawrkar sum bawm atanga pek hi mipui sum tho a ni a, hloh a ni lo, tangkai taka mipui sum hmanna a ni mai. Chutiang bawkin tuilaknate pawh. Mipui welfare atana thawh hi sawrkar awm chhan ber a ni a, sawrkarin a awm chhan a tih hlawhtlinna pakhat heng subsidy ang te hi hloh tia sawi a rem teh teuh lo. Mi thenkhatin mipui chanai tur an eiruk hi mipui sum ‘hlohna’ a ni a, hengte hi mutmawh hnarmawhah neiin kan vei zawk tur niawm tak a ni.