Sawrkarin Bangladesh raltlan khaw 4-ah sawikhawm a tum

Sawrkarin Bangladesh raltlan
khaw 4-ah sawikhawm a tum
Mizoram sawrkar chuan Bangladesh atanga raltlan Lawngtlai district-a awm mekte chu khaw pali ah sawikhawm a tum. He district-ah hian Bangladesh raltlan bik hi mi 2014 awm meka ngaih a ni.
Bangladesh atanga raltlante chungchangah adviser to chief minister Lalmuanpuia Punte, MLA chuan Ningani khan Lawngtlai district bawrhsap leh official-te Lawngtlaiah a thutkhawm pui a.
Bangladesh raltlante chu hmun li – Parva, Damdep-II, Cherluitlang leh Saizawh ‘W’ ah sawikhawm tum a ni tih Lalmuanpuia Punte hian sawiin, heng khaw 4 zirchiang tur hian Study Team-in an tlawh vek tawh a; khawtlang hruaitute pawh sawipui an ni tih a sawi. Study Team hian an thil zir leh enfiah chu sawrkara ‘High Level Committee on Bangladesh Refugees’ a an thlen leh tur thu a sawi a ni.
Adviser to CM chuan Bangladesh atanga raltlan awm mekte dinhmun enfiah bakah raltlan lo lut leh tur an awm pawha mumal zawka lo dawnsawn dan tur zirchiang tura kal an ni tih a sawi a. Raltlanten awmna atana an duh duhna hmun an thlang emaw hmun hrang hranga an kalkual thin chu thil fel lo tak a nih avangin, mumal zawka inkaihhruaina siam a tul tih a sawi. Raltlan enkawl kawngah hmunkhata an awmkhawm chuan sawrkar tan pawh hma lak a awlsam dawn tih a sawi bawk.
Lawngtlai bawrhsap Cheemala Siva Gopal Reddy chuan Lawngtlai chu Myanmar leh Bangladesh ramria awm a nih angin raltlan an tam a. Tunah hian Myanmar raltlan 6030 leh Bangladesh raltlan 2014 bakak Manipur atangin sahimna zawnga rawn lut 84 an awm mek tih a sawi. Raltlan enkawl kawngah theihtawp chhuah a ni, tiin, raltlante tan buhfai sem mek a ni a. Raltlante chhawmdawl kawngah sawrkar laipui leh Mizoram sawrkar duh dan leh thupek anga hma lak zel a nih tur thu a sawi a ni.