Sawrkarin buh hum qtl. 1400 lei tawh

On Apr 10, 2025 14 0

Sawrkarin buh hum qtl. 1400 lei tawh
Mizoram sawrkarin loneitute buh hum quintal 1400 chuang a lei sak tawh a, leina atan hian cheng nuai 44 chuang sen a ni tawh.
Sawrkarin Mizoram buh thar a lei khawmna hmun, Pangbalkawn Kolasib-a Om Om Modern Rice Mill chu Nilaini khan Food Civil Supplies & Consumer Affairs minister B Lalchhanzova’n a tlawh a. Chhinchhiah danin, 2024 December 19 atanga tun thlenga sawrkarin buhhum a lei tawh hi quintal 1472.80 a ni a; hei hi Rs. 4,418,400 man a ni. Sawrkarin a tum ber chu, loneituten incentive dawng tha se, sawrkar sum senso a tam deuh a nih pawhin nakin zelah Mizoram-in buha a intodelhna atana pawimawh tak a nih rin vang a ni.
Mizoram buh thar lei hi Bana Kaih Policy hnuaia Mizoram sawrkarin phai atanga buhfai a chawkluh thin tihtlemna tur leh loneituten an tangkaipui zawkna tura tih a ni a. Kolasib leh Mamit district chu pilot project atan puangin, buh hum hi khaw hrang hrangah mimal emaw farmer producer organisation emaw farmer producer emaw society dang kaltlangin an phurkhawm thei a, an phurhna rate erawh anmahni inbiakremna a ni ang. Sawrkar hian kg. ah Rs.30-in a leisak a ni.
FCS&CA minister chuan Mizoram sawrkarin state pawn atangin thla tin buhfai a lakluhnaah state pawnah sum tam tak a kal chhuak a. Heng ngaihtuah leh loneituten an buh thar atanga hamthatna tha zawk an neih theihnan sawrkar chuan Paddy and Rice Procurement Committee dinin, state tharchhuah buh leikhawm chu 2024 December atang khan kalpui a ni tih a sawi.
Buh hum lakhhawm leh a tul dang, leikhawm theih tura buaipui ngai buaipuitu Agriculture department nen an thawhdunna lawmawm a tih thu a sawi a. Sawrkar chuan buha kan intodelh theihnan, kumtina kan buaipui thin monsoon stock hnianghnar taka a awm theihnan leh loneituten an tharchhuah awlsam zawka an tih ral theihnan ruahmanna a siam mek tih a sawi bawk.
Kolasib DAO sawi danin, buhhum kenkhawm hi Nilaini-ah an enfiah thin a, Ninganiah leikhawmin, Zirtawpni ah document tihfel thin a ni. A karlehah a leina sum an tifel thin. Rice mill hawn a nih atang hian sawrkarin tum 10 a lei tawh.
Om Om Modern Rice Mill neitute sawi danin, rice mill hi kum 2017-a din niin, 2022 March 17-a hawn a ni. Duhthusama buh her tur an la hmuh loh avangin ‘fair average quantity’ ang pawha kalpui loin, an hmuh ang ang an her a ni.