Sawrkarin e-office a kalpui tan

Mizoram sawrkar chuan lehkha hmanga file system kalpui mek thlakna atan e-office a kalpui tan. Information & Communication Technology minister Dr Vanlalthlana chuan, sawrkarin chak leh langtlang zawka sawrkar file a kal theihna turin e-office hman tha a ti a, 2024 January atangin hma lak tan a ni a. A bul tanna atan Secreteriat tih hmasak a, chumi zawhah directorate leh district office-ah kalpui tum ni tih a sawi.
Hemi atan hian fund awm thei ngaihtuahin, proposal siam chu sawrkar laipuia Department of Administrative Reforms & Public Grievance (DARPG) atangin 2024 October 11 khan cheng vaibelchhe 1.99 hmuh a ni a. Hetihlai hian Ministry of Electronic & IT chuan kum thum chhung atan hmarchhak state ho leh union territory (J&K & Ladakh) tan e-office license leh hosting man a tumsak tur thu an dawng zui tih a sawi a ni.
e-Office atana an software hman chu National Informatics Centre siam niin, deployment leh hosting chu RailTel tih a ni thung tih ICT minister hian a sawi a. DARPG atanga sum an dawn hi computer set, printer, leh scanner leinan bakah training leh e-office kalpuina senso atan hman a ni a, Secretariat building-a IT infrastructure pawh thuamthat mek a ni tih a sawi.
Internet tha tak neih a pawimawh avangin 1 Gbps backup line bakah BSNL atangin redundant line tur 1 Gbps dark fiber nei turin hma lak mek tih a sawi bawk.
e-Office hi kumin April 18-ah ‘go-live’ niin hman tan a ni a. Secretariat-a department thlan bik pali – DP&AR, ICT, School Education leh PWD-in an hmang hmasa a. Tunah Secretariat-a department zawng zawng (41) bakah Chief Minister Office (CMO) ah hman a ni tawh tih a sawi a ni.
“eOffice hmang hian file 6492 kaltir niin, heng file hi vawi 63565 khawih chet a ni tawh a. File kal a chakin a awm reina dawhkan hmuh theih vek a nih avangin tumahin file an kawl rei ngai lo a tih theih. File pawimawh pawh in lamah leh zinna thlengin a en/ khawih theih a. Hei hi a bikin minister, chief secretary, secretary leh senior officer-ten an hmang tangkai hle. File bo a awm theih tawh loh bakah file kenkual a awm tawh loh avangin confidentiality atan a tangkai a. Lehkhapuan hman a tlem tawh dawn avangin sawrkarin sum tam tak a hum thei bawk ang,” Dr Vanlalthlana hian a ti.
Zawhna chhangin ICT department hotute chuan e-office a file kal vel hi mipuiin an hmuh ve ngawt theih a ni loa, thingtlak kilkhawr tak atang pawha a khawihtu tur official-in file a khawih theihnan internet tha nei turin ruahmanna siam a ni. Sawrkar department website update that leh that loh chu a department lam chak leh chak loh a ni a, department tinin a enkawltu tur web manager an nei hrang theuh a, chumite training lo pek chu an ni hna chu a ni mai tih an sawi.
Website server upgrade chungchanga ICT minister sawi:
8 ICT department-in mizoram.gov.in domain website 318 leh web application 14 a enkawl mek a. Institution domain ac.in leh edu.in hnuaiah website 12 a enkawl bawk.
8 Heng zinga website tam ber hi ICT department siam (in-house), Senhri Content Management System a ni a. Heng website hi kum 10 chuang Ctrl-S Data Centre-ah host a lo ni tawh.
8 Tunhnaia India leh Pakistan inkar boruak a that loh bakah India chu khawvela ram hmasawn pawl a nih tak avangin, ram hrang hrang atangin cyber attack a awm reng a. Mizoram bik chauh niloin, state hrang hrang pawhin an tawng reng bawk.
8 Khawvel boruak inlumlet zel thlirin ICT infrastructure thuam chak chu tih makmawha ngaiin, server host-na thin Ctrl-S Data Center atangin a aia tha zawk leh secure zawka ngaih Google Virtual Private Server (VPS) lama insuan mek a ni.
8 ICT department chuan kumin June 12 khan sawrkar website hrang hrang server a upgrade avangin, a hmang thintu mipui tan hun engemawti chhung tlawh pawh theih a nih loh tur thu office circular a tichhuak.
8 VPS thara website hrang hrang suan luh a nih dawn takah chuan website zawng zawng internal security audit tih leh vek a ni a. Website 318 chuang audit hian hun a duh rei deuh dawn a ni.
8 Tun thlengin department website 23 tih nun tawh a ni a. Web application nei ho – ILP, Handholding, Dakpu, DC online, e-Leave, mPass, fire & emergency online, land tax, MAeNGA, Mizothlaithar, MPSCOnline, RTI online, SPARTAN leh service window pawh mipui tan hman theih turin Google VPS-ah dah vek a ni tawh.