Sawrkarin general consent a pe lo – PC president

Mizoram sawrkarin a duh phawt chuan CBI chu duh duha thil chhui thei turin general consent a pe thei a, tunah erawh general consent hi a pe lo tih PC president Vanlalruata chuan a sawi.
Zirtawpnia an party office-a thu a sawinaah PC president hian Mizoram sawrkar leh CBI indawr tawh dan hrang hrang a sawi a. Kum 1990-ah Mizoramin CBI hnenah consent a lo pe tawh a; 1995-a hei hi sawrzim a ni a, 2002-ah consent tihtawp a ni tih a sawi.
“ZPM a lo sawrkar a, an sawrkar hlimteah general consent an pek thu insawitheihnan an hmang a. Mipui pawh kan lawm a, corruption case liante CBI-in an chhui hun tlumtea thlir taka kan thlir laiin, kumin June 27 khan hei hi tihtawp leh a ni,” a ti.
Heti chunga chief minister leh ram hruaitu thenkhatin CBI general consent pe anga an sawi reng chu a dik loa, an party dan hremi ho phei chuan CBI general consent pek theih a nih loh thu hial an sawi tih Vanlalruata hian a sawi a ni.
“Hetiang thu inkalh ngaihthlak fo hi a ninawm a. CBI general consent pek hi a that leh that loh chu a thlirtu ngaihdana innghat a ni. Chutihlaiin sawrkarin a duh a nih phawt chuan general consent hi a pe thei. Mahni party legal cell-in consent pek theih loh anga an sawi bawk si, hruaituten consent pe anga insawi bawk si hi thu awmze neilo a ni,” a ti.