Sawrkarin ‘ruihhlo do’ khuhhawng
Mizoram sawrkarin ruihhlo do beihpui thlak a tumnaa hma la tura a din, Ruihhlo Do Working Committee chuan Thawhtanni khan an khuhhawng.
He Committee chairman, Excise & Narcotics minister Er Lalrinawma chuan ruihhlo leh a kaihhnawih harsatna in Mizoram min run nasa hle a. Ruihhlo hmansual leh dan loa tawlhruk hian mimal leh khawtlang nun a tichhiain, hmasawnna kawng hrang hrang a tithuanawp a, pawikhawihna leh dan bawhchhiatna a thlen nasa hle tih a sawi.
Chief minister hmalakna in 2022 May khan ‘Core Committee on Ruihhlo Do’ neih a ni tawh a, Committee rel angin Social Welfare minister kaihhhruaina hnuaiah Working Committee din nghalin, ruihhlo do kawngah chak zawka hma lak a nih theihna’n supply reduction, demand reduction leh harm reduction ah khairual taka thawhho a tul tih minister hian a sawi.
Finance changtu chief minister Pu Zoramthanga remtihpuina in thawh ho dan tur ruahmanna siamin, sum mamawh zat te duan a ni a. Working Committee ruahman angin district tinah bawrhsap kaihhruaina in Task Force din a ni a, an ni hian district leh village level-ah ruihhlo dona kawngah chak takin hma an la dawn tih a sawi bawk.
“Ruihhlo dona atan chief minister-in kan mamawh ang min pe thei hi kan lawm a, ruihhlo dona kawnga thawktute a ngaihpawimawh zia a tilang chiang hle. Chutih rualin ruihhlo do kawngah hian NGO, Khawtlang, chhungkua, mimal tin kan tanrual a ngai takzet tawh a ni,” a ti.
He hunah hian ruihhlo dona atan hman turin NGO, department leh district tuna bawrhsap te hnenah cheng vaibelchhe 3 sem rual a ni.
Sawrkarin ‘ruihhlo do’ khuhhawng
Get real time updates directly on you device, subscribe now.