Sawrkarin sawhthing auction dawn Hmunphiah grade then loin lei tum

Sawrkarin sawhthing auction dawn
Hmunphiah grade then loin lei tum
Mizoram sawrkar chuan hmunphiah chu grade then loin kg ah Rs. 80 in a chingtute a leisak dawn a; sawhthing lei khawl sa chu a auction dawn bawk.
Mizoram Agricultural Marketing Board (MAMB) thuchhuak chuan, sawrkarin hmunphiah ro grade ‘A’ leh grade ‘B’ lei/ hralhna tur alo ruahman lawk chu hmunphiah chingtu tam zawkin grading an tih theih tak loh avangin empanelled buyer-ten an duh khawp hmunphiah ro (graded) lei tur an hmu zo lo tih a sawi a. Hetihlai hian hmunphiah chingtuten a hralhna kawngah harsatna an tawk tih hriat a nih avangin, MAMB chuan March 2025 atangin Secondary Collection Centre (SCC) hrang hrangah hmunphiah ro, a keh huna keh leh ro tha la hralh loh chu ZOHANDCO kaltlangin kg. khat Rs. 80 (ungraded) in a lei dawn tih a sawi.
Hetihlai hian tun thlenga Mizoram Agricultural Marketing Board hmalakna hnuaia Mizoram hmun hrang hranga hmunphiah lei tawh zat chu quintal 20536.50 a ni tawh tih a sawi a ni.
Mizoram Agricultural Marketing Board hian sawhthing auction kalpui turin a rel bawk a. Hei hian Buffer Stock Sairang ami leh district hrang hranga Secondary Collection Centre ami a huam dawn tih sawiin, auction hmasa ber hi February 25 chawhma dar 11.00 atanga tanin, February 27 tlai dar 4.00 thleng thehluh theih a ni tih a sawi a. Auction chhang duh chuan MAMB member ho hnenah ngaihven theih a ni tiin, auction hi March atang chuan kartin Thawhtanni atanga Ningani inkarah kalpui thin a ni dawn tih a sawi a ni.