Sawrkarin Thaidawr tlangah hma la lo turin Tripura hrilh
Mizoram sawrkar chuan Thaidawr tlang Phuldungseia hnathawh mek chawlhsan nghal turin April 16 tlai khan Tripura North district thuneitute a hriattir.
Home minister K Sapdanga hnen atanga thudawn danin, Mizoram sawrkar chuan Thaidawr tlanga Tripura sawrkarin hna an thawk hi Mizoram sawrkar chuan tha a ti lo a. Nilaini tlai khan Tripura North district thuneitute chu hnathawh chawlhsan tir nghal tura hriattir an ni a, hnathawh hi chawlhsan a ni tawh.
Mizoram sawrkar chuan district level-a inbiak phawt a, a tul a nih chuan state level thlenga inbe chhunzawm turin ruahmanna a siam tih a sawi.
Thaidawr tlang, Phuldungsei Mizoram chhunga Tripura sawrkarin tunhnaia hma a lakna chu Nilaini khan MZP Gen. Hqrs hruaitute chuan a hmunah an enfiah a. Thawhlehni khan Forest minister Lalthansanga’n a lo tlawh tawh bawk.
Mizoram chhunga Tripura sawrkarin kut a rawn thlak fo chu hriatthiam har an ti hle tih MZP hian sawiin, helai hmuna hmalakna zawng zawng titawp nghal turin a hmuna thawktute an hriattir a. Mizoram sawrkar pawhin Tripura sawrkar chu a ranglama an hmalakna titawp tura hriattir turin a ngen tih an sawi a ni.
Mizoram sawrkarin Thaidawr tlang panna kawng, link road laihtlang pawh ngaihven zui nghal thuai turin a ngen tih a sawi bawk.
Phuldungsei Village Council hruaitute leh Mizo Convention: Youth Wing, Jampui Hills ten an lo tawiawm a ni.
MZP Gen. Hqrs hian Thawhlehni tlai khan chief minister Lalduhoma hmuin, Mamit district Phuldungseia Tripura sawrkar hma lak thu hi thlenin, Thaidawr tlang hi Mizoram leh Tripura ram inchuhna hmun a nih anga, a rang lama sawrkarin ngaihven tur leh Tripura sawrkar hmalakna tih tawp tir turin chief minister leh Home minister an ngen a ni.
Sawrkarin Thaidawr tlangah hma la lo turin Tripura hrilh
Get real time updates directly on you device, subscribe now.
Next Post