Sawrkarin thil dik lo a ngaithei loa, kan chhuichhuak zel ang – Chief minister

Politics a nih avanga belhchian dawl lo leh dawt hmanga inbeih chu tawp tawh se an duh a. Thil dik lo chu sawrkarin a ngaithei dawn loa, an chhuichhuak zel dawn tih chief minister Lalduhoma chuan a sawi.
Lok Sabha inthlan atana Tuichang leh Hrangturzo bial a tlawhnaah ZPM leader Lalduhoma chuan an MP candidate-in beih a tawk nasa a, ram hlui politics zia kan la kalsan thei lo chu a pawi an takzet tih a sawi. An candidate chu thil tisualtu niloin thil tisualtu chhuichhuahna atana mi tangkai tak a nih laiin, a leh a linga mipui rilru hruaikawi zawnga thil an sawi chu a pawi hle tih a sawi a ni.
“Nasa takin a pawl leh a mimal angin min bei a, a tuk maia thudik lang leh tur leh thu belhchian dawl lo hmanga min beih avanga tun dinhmun thleng thei hi kan ni. Thudik hi a tlo ber thin a, politics a nih avanga belhchian dawl lo leh dawt hmanga inbeih hi tawp tawh se kan duh. Thil dik lo hi sawrkar hian a ngaithei dawn loa, kan chhuichhuak zel dawn,” a ti.
Sawrkar angin hmalakna tur an ngah hle a, central lamah project umzui tur tam tak a awm a, chumi ti tur chuan MP kan mamawh a, Mizoram leh India inkar palai tur kan thlang dawn a, state sawrkar nena tha taka thawk dun thei tur ZPM candidate Pu Richard Vanlalhmangaiha chu thlangtling turin Zoram mipui a sawm tih Lalduhoma hian a sawi.
Ram inrelbawlnaa thil pawimawh tak chu sum a ni tih a sawi a. Leiba thahnem tak an chhawm a, chu chu insawichhiatna niloin, kan dinhmun dik tak a sawi tih a sawi. “Inrenchem turin hma kan la nghal a, hruaituten hma hruaiin kan facilities dawn tam tak a zatve in kan tihniam a, awmzia thui tak a neiin kan hria. Sum hi puk loh theih loh a ni a, puk phal chinah pawh nasa takin kan inrek bung a ni. Kan budget a inren zawngin kan siam a, sum hi dik taka hman chuan a lo indaih theih hle a ni tih kan hria,” chief minister hian a ti bawk.
Health care bill ba zawng zawng kan tifel ta vek chu Pathian leh thawktute zar a ni tih a sawi a. Ram rorelnaah Pathian ram a thleng zel nia an hriat thu leh mipui nen tha taka thawh ho zel an duh tih a sawi a ni.