Sazu puangin khaw 138 nghawng tawh
Thingtam avanga Mizorama sazu puang mek chuan district zawng zawng a tuamchhuak tawh a, khaw 138 a nghawng tawh.
The Aizawl Post-in a zawhchiannaah sazu hi district zawng zawngah puang tawh mah se, Khawzawl district a nghawng na ber a, Champhai district chu a ziaawm ber a ni thung. Khaw 138 a tuam tawhnaah hian huan/ lo an neih zau zawng a vaia belhkhawmin hectare 6859.554 a ni a, hemi atang hian sazu in an beih tawh hi hectare 1620.854 vel nia chhut a ni. Chhungkaw 4025 a nghawng tawh tih Ariculture & Farmers’ Welfare department hotute chuan an sawi.
Khawzawl district chu a tuar na ber a ni a, Mamit leh Siaha district-in an tuar na leh deuh nia sawi a ni. Leilet buh a la vui loh avangin tlangram lo buhin an tuar nasa rih hle tih sawi a ni bawk.
Sazu hian buh an bei ber a, buh ei tur an hmuh loh chuan vaimim, fu, be lam chi, sawhthing, bawkbawn, hmarha, chhawhchhi leh fanghma te pawh an ei/ seh chhe tho tih thudawnna chuan a sawi ni.
Ariculture & Farmers’ Welfare department hotute sawi danin, Thingtam hi kum 2023 atanga 2025 inkar vela thleng tura ngaih sa a nih avangin an lo inruahman lawk a. Kumin kumtir atang tawh khan district tinah sazu suatna atan sazu tur an lo khawl lawk a. Village council leh loneitute pawh an hrilhhre tam a, sazu chetna hnuhma an hriat veleh anmahni enkawltu District Agriculture Office hotute rang taka an hriattir theihnan a biakpawhna tur an thehdarh a ni.
Sazu tur bakah hian sairawkherh, vaithang, mangkhawng leh thangchep hmangin man an ni tih an sawi a. Hetianga tih a ngaih chhan chu, sazute hian tur an eiin an bu an thlen hnu ah a lang chhuak tlangpui a, hetah hian a ei ve lo ten, an rim atangte in an lo hrethiam hma hle a, a inchhawkin tur/damdawi leh Mizo thang ang chi ho hman kual fo a ngai thin tih department hotute chuan an sawi.
Department hotute chuan Raw thing hi a tam loh avangin Mautam ang em em chuan Thingtam hi a nasa ngai lo. Mizorama Thingtam a thlen hnuhnung ber chu kum 1977 a ni a, kumina a thlen bak hi a thlen leh hun tura ngaih chu kum 2073 a ni. Mautam hnuhnung ber chu kum 2007 a ni a, a dawt leh tur chu kum 2055 a ni. Kum 48 dan velah zel a thleng thin a ni.