SC-in Arvind Kejriwal dilna hnawlsak

Supreme Court chuan Delhi Chief Minister Arvind Kejriwal-an thla kaltaa liquor policy scam kaihhnawiha money laundering case a man a nihna ngaihtuah nghal a ngenna chu a hnawl.
March 21 khan Enforcement Directorate te chuan Kejriwal an man a, April 27-a ED tena insawifiahna an neih hma zawng chu lung inah a tan rih a ngai dawn a ni.
Arvind Kejriwal chuan a tlem berah ni 10 tal lung in bang a zut a la ngai dawn a. Lok Sabha inthlan tanah pawh a chhuak thei dawn ta lo a ni. A party AAP te chu INDIA bloc a tel niin BJP te nena inbei ber an ni bawk.
Hearing neihnaah Kejriwal aiawha ding Abhishek Manu Singhvi chuan Justice Sanjiv Khanna leh Justice Dipankar Datta te hnenah ‘court shock thei khawp thudik lailan tur a nei’ tiin a sawi a.
Chu mai bakah Chief Minister tihhmingchhiat tumin nasa taka hmalakna a kal mek tia sawiin Zirtawpniah a dilna chu ngaihtuah nghal a ngiat zui a.
“A hun kan bituk ang a, mahse, in duh hunah a ni lovang” tiin court chuan Singhvi hnenah a hrilh a ni.
Supreme Court thutlukna siam chu AAP tana campaign theih beisei Kejriwal tan chuan pawi tak niin kar kalta khan Delhi High Court pawhin a ngenna a lo hnawlsak tawh bawk a ni.