SC in NEET-UG cancel duh lo

Supreme Court chuan August 2 khan National Testing Agency (NTA) te chu undergraduate National Eligibility-cum-Entrance Test 2024 chungchangah na taka sawiselin sorkar chu exam kalphung siam tha vek turin a ti bawk.
Three-judge Bench Chief Justice of India DY Chandrachud kaihhruai chuan Centre chu high-powered committee Indian Space Research Organisation Chairperson hlui K. Radhakrishnan kaihhruaina hnuaia a din hmangin exam process chu a ler atanga a bulthut thlengin siamtha vek turin a ti a. Chung zingah chuan security siamthat te, data protection te, periodic audit, exam centre inspection, grievance redressal mechanism te pawh titha vek turin a ti bawk a. Eng vangin nge question paper thenkhat te chu exam centre thenkhatah e-rickshaw-a phurh a nih, a ti bawk.
Chief Justice Chandrachud chuan judgement a siamah NTA te chetsualna chu zirlai tena an zawh loh ‘luxury’ a ni, a ti bawk a.
“Centre in high-powered committee hmangin NEET kalpui dan a siam danglam vek tur a ni. Khatiang exam ang kha kan hmu nawn leh tawh tur a ni lo” tiin Chief Justice Chandrachud chuan Centre leh NTA counsel Solicitor General Tushar Mehta kaihhruai te chu a hrilh a.
“He case-ah hian NTA hian flip-flops a pumpelh tur a ni a. NTA flip-flops hi zirlai te tana tha a ni lo” tiin Chief Justice chuan a sawi bawk.
Court chuan NTA tena question paper tihchingpen a nih dana version hrang hrang an pek te chu sawiin chung zingah chuan exam centre kawngka tihchhiat te pawh a sawi tel a.
Court chuan eng vangin nge NTA chuan question paper dik lo an pek avangin a tirah zirlai 1536 te hnenah compensatory mark an pe ringawt a ti bawk a. Chu chu a hnuah thlak danglamin chung mite chu a exam thattir leh a ti bawk a.
NTA chuan NEET paper-a Physics question-ah chhanna option pahnih a dah te chu a dik ve ve tiin grant mark a pe leh bawk a. Mahse, a hnuah Indian Institute of Technology (Delhi) team te chuan Supreme Court ngenna anga an enfiah hnuah chhanna pahnih zinga pakhat zawk chauh chu a dik tih a ni leh bawk.
“NTA grace mark pek avangin zirlai 44 laiin NEET-UG ah mark 720 ah 720 an hmuhphah a ni. IIT(Delhi) report chuan heng zirlai 44 te hian mark an hloh tiin chumi hnuah rank list siamthat leh a ni. NTA structural process ah hian thil fel lo a awm a ni. Committee (Radhakrishnan panel) in a siamtha tur a ni” tiin Chief Justice Chandrachud chuan a sawi bawk.
NEET-UG 2024 hnawl tawp tura ngenna chu hnawl thungin court chuan ‘systemic breach’ a awm lo tia sawiin court chuan Radhakrishnan Committee chuan exam security leh administration tha zawk a awm theih nan ruahmanna an siam tur a ni a ti bawk a.
Judgement chuan Standard Operating Procedure (SOP) siamah chiang takin timeline hrang hrang candidate registratioon, preferred cities te, OMR sheet seal te chu hun bi tiam a siam vek tur a ni a ti bawk a. Hei mai bakah hian identity check khauh zawka kalpui te pawh privacy law bawhchhe lova kalpui tur a ti bawk.
Court chuan exam centre-ah CCTV surveillance tha tak dah tur ti bawkin chumiin a tum ber chu thil dik lo tih tumna dan nan leh thil duhawm lo a thlena finfiahna neih nan a ti bawk. CBI ten an chhuichiannaah Bihar a paper leak chu private school exam centre a hmanah a thleng tih a ni.