SC-in newsclick founder chhuah zalen

Supreme Court chuan kum 74-a upa journalist leh online portal NewsClick founder Prabir Purkayasta chu Unlawful Activities Prevention Act (UAPA hmanga Delhi police tena an man chu ‘dan mitah chuan dan kalh a ni’ tiin chhuah zalen nghal turin a hriattir.
Bench of Justices B.R. Gavai leh Sandeep Mehta te chuan Purkayastha emaw a counsel te chu man a nihna chhan ziaka hrilh hriatna a awm lo a ti bawk a.
Magistrate cpurt chuan October 4, 2023 khansenior journalist leh a lawyer te pawhin man a nihna chhan ziaka an hrilh hmain police custody a awm remtihna a pe a ni. Supreme Court chuan Purkayastha chu October 4 zing lam khan a mimal zalenna nasa taka tihbawrhban sak a ni a ti bawk a.
“Man a nihna chhan leh eng vanga man nge a nih chu Pursoyastha leh a counsel te hnenah October 4, 2023 a man a nih hma khan hrilh hriatin an awm loh avangin court chuan chhuah zalen turin timna pakhatmah a nei lo,” tiin Justice Mehta chuan a sawi a.
Man a nih veleh Delhi Police-te chuan rang takin magistrate hnenah hruai nghalin magistrate chuan police custody a awm remtihna a lo pe nghal a ni.
Hearing neihnaah Purkayastha chu lawyer pek niin police te chuan a lawyer chu man a nihna chhan pawh an hrilh hek lo. Magistrate in police custody a awm remtihna a pek hnuah chauh police team te chuan WahstApp hmangin man a nihna chhan a lawyer hnenah an hrilh chauh a ni.
Eng vangin nge hrilh hriat kan nih loh tih kan zawhin police te chuan zinglam dar 6 a nia tiin min chhang a ni. FIR pawh min pe lo va, kan dil zawk a, police ten min hnawlsak a. Man a nihna chhan hrilhhriat kan ni reng reng lo tiin senior advocate Kapil Sibal, Purkayastha tana ding chuan a sawi a.
Sibal chuan mi man theihna chu mahni duh dan dana kalpui thih a ni lo tia sawiin, “A chhan leh vang fel tak a awm tur a ni a. Chutiang a nih loh chuan mimal zalenna chhuhsakna a ni,” tiin Sibal chuan a sawi bawk.
Delhi police aiawha ding Additional Solicitor General S.V. Raju chuan Purkayastha chu man a nihna chhan tawngkain hrilh a ni a ti a.
Police-te chet dan chu na taka dem thungin Supreme Court chuan Purkayastha chu police kut atanga chhuah a phu tiin a sawi a. Court chuan Pankaj Bansal case a judgement a lo siam tawh sawiin police te chuan Purkayastha hnenah man a nihna chhan ziak ngeiin an pe tur a ni a ti bawk a.
Court thutlukna chuan journalist man a nihna chu hlihsakin, Delhi High Court-in mana tantir a nihna chungchanga thutlukna a siam tur pawh a hnawl sak rih ta a ni.
Raju chuan Pankaj Bansal case chu money laundering case a ni a, UAPA ang a ni lo a ti a. Law officer chuan UAPA hnuaiah chuan accused chu man a nih dawnin ziaka man a nihna chhan hrilh kher a ngai lo va, man a nih thu hrilhhriat a tawk a ti a.
“Delhi Police ten Pankaj Bansal judgement chu Prevention of Money Laundering Act (PMLA) case a ni a, tuna mi hi chu UAPA a ni an ti a. Mahse, ka zawhna chu Magistrate hnenah bail dil dawn ila min manna chhan ziakin ka hrilh dawn lo em ni? Police te hian min man chhanah behchhan kan nei an ti thei lo va, ka right leh dan kal dan bawhchhiatna zawk a ni,” tiin Sibal chuan a chhanglet thung.
Mahse, court chuan Purkayastha chuan police tena trial court ah chargesheet an siam tawh avangin bail bond a pe tur a ni a ti thung a.
Purkayastha hi thlaruk chuang tantirin a awm tawh a, Chinese funding hmangin digital media kaltlangin ‘anti-national propaganda’ thehdarha puh a ni.
He case-ah hian Delhi Police te chuan Purkayastha, activist Gautam Navlakha leh US a inbun sumdawng Neville Roy Singham te chu thubuai an siamsak a ni.
NewsClick founder Purkayastha man a nih hnuah journalist tam tak te chuan Chief Justice of India hnenah lehkhathawnin journalists, editor, writer leh profession 46 te NewsClick nena inzawmna neia ngaia an dap thu leh an electronic device te an chhuhsak avanga hma la turin an lo ngen tawh a ni.