SC-in Nun te chhiah pek tir tumna ngaihtuah dawn
Supreme Court chuan Roman Catholic nun-te hlawh atangin income tax lak tur a nih leh nih loh ngaihtuah a remti.
Christian missionary order, Franciscan atanga Carmelites te chuan court hnenah nun leh priests te chuan retheih huama intiamna an neih hnuah ‘civil death’ dinhmunah an ding a, chuvangin tax an pek a ngai lo an ti a. An ‘hlawh’ te chu mimal thilah hmang lovin an pawl congregation tan a ni an hman ni an ti bawk.
Nun-te chuan thutiam pathum thuawihna, mipat hmeichhiatnaa fihlim leh retheihna te intiamin training hautak tak an paltlang vek bawk a. Property neih phal a ni lo va, pasal a nei miah tur a ni bawk hek lo. Nun te chuan sakhaw thilah inhnimphum tawpin an hlawh tinte pawh congregation tan vek a ni a. Congregation chuan a tul chuan tax an pe mai a ni.
“Miin retheih a intiam chuan an chhungkuate nena he leia an inlaichinna zawng zawng pawh an chhu chat vek a ni. Chuvangin civil death dinhmunah an ding a ni. An hringtu nu leh pate ngei an thi a nih pawhin nu leh pate ro pakhat mah an khawm thei lo bawk” tiin petition pakhat Sister Superior of the Franciscan Missionary of St. Clare aiawha advocate Romy Chacko thehluh chuan a tarlang.
December 1, 2014 a Income Tax Department tena education authority leh district treasury officers te chu sorkar atanga hlawh la tho si religious congregation member te atanga Tax Deducted at Source (TDS) chu hmang tura tihna chu khinna a awm nual a.
He directive hi Kerala High Court ah pawh khin tawh niin mahse an hlawhtling lo. High Court chuan canon law heng religious congregation tena an neih chu an member te lakah an hmang thei a, mahse civil law a khum thei lo a ti.
Tunah Supreme Court-ah kalpui leh niin mi tu pawh ‘civil death’ dinhmuna ding chu income nei thei a ni lo an ti a. Mahse, High Court thung chuan miin ‘civil death’ dinhmun a luh chuan ‘regular activities’ a nei thei lo va, fundamental rights pawh enjoy thei a ni lo a ti thung.
“High Court-in civil death leh fundamental rights hnawlsak chu a chawhpawlh dik lo a ni. ‘Civil death’ awmzia chu income a nei thei lo va, proprietary rights pawh a hloh vek bawk. Civil death avangin fundamental rights hnawlsak veka khung hran bik tur tihna a ni lo. Profession a nei thei lo ang tihna a ni lo va, profession a neih pawhin chuta a hlawh te chu ama tan a ni lo tihna zawk a ni” tiin petition chuan a tarlang bawk.