Scholarship pek chhuah har avangin zirlaite chu Mizoram Scholarship Board (MSB) Office kawtah ni hnih chhung ngawt mai lungawilohna lantirin an pungkhawm ta a. Scholarship phutin vawiin lamah MSB staff-te office kal tur dan an tum tih an puang zui bawk.
Zirlaiten an sawi dan chuan, zirlai 19,495 hnena pekchhuah tur scholarship second installment cheng nuai 1,787.48 hi Mizoram sawrkar kutah kumin September ni 25 khan a lut a. Scholarship sum hi thla khat chuang zet an nghah hnuah pawh November 3 thleng khan file a la che lo niin an sawi a.
Scholarship Board lam hian Election Commission-ah phalna lak a ngai niin an sawi a, MZP lam hian Mizoram Joint CEO (Jt. Chief Electoral Officer) hmuin zirlaite scholarship pekchhuah vat a Tul thu an sawipui nghal a. Chief Election Commissioner of India hnenah phalna pe turin Jt CEO hian ngenna lehkha a thawn nghal niin zirlaite hian an sawi a ni.
Thil kal dan han thlir hi chuan, zirlaiten ‘MSB-in zirlaite an ngaihthah’ tia an sawi hi a pawmawm thei awm e. Inthlan hun puan hma ni 13 daih tawhah pawisa hian Mizoram a lo thleng a nih chuan, zirlaite scholarship chingfel tura din Board hian chinfelna hun thawl chu an nei niin a lang. Tun hnua Election Commission-ah phalna lak a ngai anga an sawi hnuah pawh, MSB lam hian phalna chu an lo la dil chuang lo niawm tak a ni a, chu chu zirlaiten Jt CEO an sawipui a ngaih dan aTang hian a chhuidawn theih mai awm e.
Hetianga lungawilohna lantir hial ngaia zirlaite an awm chhan hi thuneitute lam pawh hian sawifiahin, zirlaite lungawilohna thawi damna tur ngaihtuahsak vat se a duhawm hle. Scholarship chinfel hna thawk tura din MSB hian zirlaite harsatna a siam zawk hlauh a nih chuan thil dik lo tak a ni ang.
Scholarship-a harsatna thleng hi…
Get real time updates directly on you device, subscribe now.
Prev Post
Next Post