School calendar atan Jan-Dec Hindi thiam nal hma tir tum

School academic session thar atangin pawl 1 atanga pawl 10 chu January – December class an kal dawn. Pawl hniam atanga zirlaiten Hindi an thiam nal theihnan ruahmanna siam a ni bawk dawn.
Mizoram Education Reforms Committee (MERC) vawi 14-na chu an chairman, Education minister Dr Vanlalthlana kaihhruaiin Zirtawpni khan an thukhawm a. MERC leh School Education department tangdunin mipui leh zirna kaihhnawih pawl leh a fawng vuantute nena inrawnkhawm an lo neih tawh hrang hrang thlirin an sawiho. Inrawnkhawmnaa rawtna lut leh sawihonaa sawitute rawtna chu ngaihtuah a nih hnuah thutlukna siam a ni.
School calendar-ah school kal hun chhung atan January to December (calendar year) chu pawl 1 atang pawl 10 inkar tan hman a ni anga, HSLC exam erawh a pangngaiin a kal ang. He academic session thar hi 2027- 2028 session atanga hman tan tum a ni.
School uniform chu school tinin zalenna neiin an duh an thlang thei anga, school kai tan hun pawh tuna hman mek hi hman chhunzawm a ni ang.
Hindi zirna tih hmasawnna atan hmalakna hmasaah zirtirtu thawk laite tana training changtlung tak buatsaih a ni anga, zirlaiten pawl hniam zawk atanga Hindi an thiam nal theihna atan ruahmanna siam niin, a kimchang chu hun remchang hmasa bera puan tum a ni.
Heng bakah hian MERC thutkhawm chuan 2026- 2027 HSLC leh HSSLC Board examination result buah top 10, subject topper leh division tarlan thin chu tihtawp an rel a. English medium school-te tan ‘mahni tawng (home language) hman ni’ chu kar khatah ni khat siam nise, an ti a. A ni (day) chu school-in an remchan ni ber an thlang thei a ni.