School naupang 45 atangin 201

School naupang 45 atangin 201
India ramin Delhi Public School a sawi chamchi laiin Mizoram pawhin public school tha tak a nei reng a. English medium school-in lal a hrawtna ramah sorkar school chhuanawm tak a awm.
He school hi kum 1983-1988 chhung SDEO (E) hnuaia primary school tha bera thlan ni tawh mah se, zirna inher danglam avangin dinhmun derthawng takah a ding hman. Tunah erawh Aizawla sorkar school-ten zirlai nei mang lo, zirtirtute tana sawi zahthlak khawpa tlem neia manganga an awm laiin, Ramhlun South Primary School chuan naupang a ngah a, a neih theih tur bituk aia tam daih a nei.
Sorkar school a ni bawk a, school notice board ah SSA atanga sum dawn tawh te, dawn ni leh kumte nen SSA Grant Display Board siamin hmuh theihin an tarlang vek a. YMA thlawpna nasa tak bakah School Education department, Samagra mission, AMC councellor Laltlanzova Khiangte leh Aizawl North II MLA Dr Vanlalthlana tih te chu tanpuitu an tarlan zingah an tel a, chu’ng mite puihna an dawn avanga an lawmna ziahlan a ni.
He school hi tlachhe hman lek lek a ni a, naupang pawh nei mang lo khan kum reilote chhungin naupang a ngah a. Sorkarin naupang 160 nei thei tura a tihah 200 chuang a nei der. Chu’ng zirlaite enkawl tur chuan zirtirtu 11 an awm a, heng zinga pasarih chu sorkara thawk nghet an ni a, pali chu Samagra hnuai ami niin, Ramhlun South YMA-in a rawih zirtirtu pakhat a awm bawk.
Sorkarin a vulh bik model school an ni lo zui a, mah se, ‘model school’ a siamna kawnga sulsutu chu Ramhlun South YMA a ni daih thung. School Management Board (SMB) neiin school tha a nih theih nan nasa takin hma an la a ni.
“Kum 2017 atang khan YMA angin school tha a nih theih nana hmalakna kan kalpui” tiin School Management Committee (SMC) member Lalrammawia Tochhawng (Amawia) chuan a sawi. YMA angin tlangval awmtha duh lo an man thin te chu case study an nei a, a tam ber chu school drop-out an ni tih an hmuchhuak tih sawiin, “School tha si, mi zawng zawngin harsatna nei lova an luh theihna leh phakna ni bawk si, fee chawi ngai lo sorkar school hi tha zawka siam a ngai kan ti a ni,” tiin, school tha siam a nih theih nana hma an lak tan dan Mizoram University Department of Education-a thawk, SMC educationist Amawia hian a sawi.
Ramhlun South YMA hian school tha siam chu a kovah dahin hma a la zui zel a, school-ah water cooler-te dahin, smart TV an dah bawk a; loan te la in school an chei. “School chei nan hian cheng nuai 17 vel sen a ni tawh” tia sawiin Amawia chuan, “School kawtah futsal ground kan siam a, phullem kan phah a, phullem hi tum hnih kan phahna a ni tawh” a ti. Naupang tinte hi identity card – smart card an siamsak vek tih a sawi bawk. “Kan fate luhna tlak ni turin ka duh a, kei ngei pawhin ka fapa ka luhtir,” a ti.
School kawta artificial grass inphah hring duai mai chu naupang tan an chawlh laia infiamna hmun a ni a, school kal loh zanlamah te, chawlh lai leh hun remchangah chuan futsal ground hi man chawia hawh theihin YMA chuan siamin, chuta hawh man tlingkhawm chu school thawmthat nan hman zel a ni. School curricular structure tur hi Ramhlun South YMA A-section hnuaia Education and Futsal Committee-in a enpui thin a, Cultural Sub Committee-in hnam lam an zirtir bawk thin.
School tlabal tak atanga tuna naupang 200 chuang nei thei head teacher T Lalmuanpuii chuan Ramhlun South khawtlang thlawpna leh tuipuina chu hahipin a sawi a. Zirtirtute pawh a ti tang hle tih a sawi.
Zing dar 8.30 ah zirtirtuten school an thleng a, zirtirtuten naupangte an chenna inah kum khatah tum khat tal an tlawh thin, tih Lalmuanpuii hian a sawi. ‘Parents – Teacher meet’ an neih bakah English grammar a bika an zirtir thu a sawi a. Co-curricular activity hrang hrang a tahtawlin an neihpui thin bawk. He school hian school kumtawpah ‘Graduation Day’ mumal leh fel takin a hmang thin a. “Staff ka nei tha em a, kan lungrual a, an talented si a, khawtlangin min tuipui bawk si,” Lalmuanpuii hian a ti.
Naupang 160 awm theia 200 pelh chuan classroom a ti tawt a, class room lah School Management Board hmalakna in a chhuatte pawh tile tha phahin class azirin awmze nei takin an ruahman vek a. Sorkar atangin kum khatah composite grant Rs. 25000 an dawn thin bak chu beisei tur dang a awm chuang lo.
Primary school-a hmalaknate a hlawhtlin thawkhat tak avangin an chawm tur middle school hmasawn zel na turin, kumin – 2023 atangin zirtirtute nen inberemin hma lak tan leh mek a ni, tih Amawia hian a sawi a ni.