Science Centre & Digital Planetarium

Lunglei Science Centre & Digital Planetarium, Zohnuai Lunglei chu Zirtawpni khan Mizoram Youth Commission chairman Dr Vanlaltanpuia, MLA chuan a hawng.
MYC chairman chuan Mizorama science centre pahnihna tur Lunglei Science Centre & Digital Planetarium peihfel a ni ta chu lawmawm a tih thu a sawi a. Mizoram chhim lam zirlai naupangte tan science zirna puitu hmun pawimawh tak leh mipui vantlang zingah pawh science hriatchianna kawnga hmasawnna thlentir tu a nih a beisei thu a sawi.
Lunglei Science Centre hi cheng nuai 697 senga Mizoram sawrkarin a din a ni a. Digital Planetarium hi Directorate of Science & Technology hnuaia awm Mizoram Science, Technology & Innovation Council (MISTIC) hmalaknaa cheng nuai 330 senga din niin, North Eastern Council atangin sum hmuh a ni.
Science Centre leh Digital Planetarium hi contractor KT Nghawra, Zohnuai Lungleiin a sa a, landscaping hi department-in a thawk. Science Centre hi Mizoram PWD design leh estimate a ni a, Digital Planetarium hi Kothari & Associate Kolkota design a ni a; landscaping hi Creative Museum Designer, National Council of Science Museum Kolkata design a ni.
Digital Plentarium-ah hian astronomy exhibition hall, conference hall leh training hall a awm nghal a. Digital Planetarium Dome hi metre 8 diameter niin, mi 50 thut theih a ni.