Scotland nulate lakah Siamite chak zo lo

Scotland nulate lakah Siamite chak zo lo
Pathianniah India chuan si li faia Uruguay sawp chungin FIH Hockey World Cup 2026 Qualifiers bul tan mah se Thawhtanni zan khan an match hnihnaah India hmeichhe hockey team chuan Scotland lakah 2-2 draw bak an pel zo ta lo a, Mizo nula Lalremsiami Hmar chuan South American team an tum tum angin goal a khung zo ta lo.
Hyderabad khaw inkhelah Siami hi India penalty corner hmasaber hlawhchhuaktu ni mah se Udita chuan a hun tha neih goal-ah a chantir zo lo a, a drag-flick chu goal ban sirah a thlawk chhuak hlauh.
India hian 3-4-3 formation hmangin bul an tan a, a tirah khawng nghal viau mah se an tlarhnung buai avangin mikhual team tan minute rukna lekah Heather McEwan chuan penalty corner atangin goal hmahruai a thun.
India erlet tan Navneet Kaur (18th minute) leh Sunelita Toppo (29th)-te’n goal khung mah se Fiona Burnet (33rd) chuan Scottish siphurh a sut ve leh tlat a, chak zawk awm loin team pahnih an inthathen.
India leh Scotland hian game hnih khelh atangin point li ve ve nei mah se goal difference-a sang zawk India nulate’n Pool B standing-ah hma an hruai a, vawiina an khelh leh turah pawh Great Britain team dang Wales an hmachhawn leh ang.
Pool B inkhel dangah an bultannaa tournament thlengtu India laka tlawm tawh Uruguay chuan 3-2-in Wales an hneh a; Pool A lamah Italy chuan Austria hnehin, Korea lakah England pawh si thum faiin an chak ve bawk.