Season tawp thlenga Feyenoord thuam inbel tur Sterling
Season tawp thlenga Feyenoord thuam inbel tur Sterling
England tana match 82 lai khel tling tawh Raheem Sterling chuan tun season tawp thleng cham turin Dutch club Feyenoord a zawm fel ta.
Chelsea leh Manchester City winger hlui Sterling hian inhriatthiamtawnnain tun January thla mai khan Chelsea a chhuahsan a; Stamford Bridge club nena inthen tura an inrem lai khan England international hian Chelsea-ah thla 18 daih contract a la nei a, chawlhkar tin £300,000 chuang a hlawh thinna club chu a kalsan ta a ni.
Kum 31 mi ni ve ta Sterling lei chhuah theih tih a rik rual khan club tam takin dawr nghal mah se Eredivisie table-a pahnihna luah mektu Feyenoord pan a thlang ta daih a; he team a pan chhan hi Manchester United leh Arsenal striker hlui Robin van Persie enkawlna hnuaia a awm vang a ni mahna.
Chu mi chungchang chu sawichhuakin, “Ka career-ah hian ka theihna min hmuhpuitu club leh head coach-te nena inbiak hram hram ka duh thin.
“Robin-a nen sawihona tha tak kan zawh hnuin Feyenoord hi ka hlimpui tur leh member hlu tak ka nih ngeina tur club a ni tih ka ringhlel ta lo a; ka tan tuipui rala inkhelh hi chona a ni ve hrim hrim a, chu mi tur chuan ka inpeih bawk a, bul tan thuai thuai hlan ka nghakhlel hle tawh a ni.
“Free agent ka nih angin, ka pan leh tur thlan chungchangah duhthlan theihna ka nei a ni,” a ti.
Point 17 hum ran chunga hmahruaitu PSV hnung dawltu ni mek Feyenoord boss Van Persie chuan Raheem-te ang player a hmin thei chu lawmawm a tih thu sawi chungin:
“A football sulhnu hian tunge a nih a pholang chiang tawh a; a theihnaa game result thlakdanglam dawrh thei player a ni tih hi rinhlelh tur a awm lo.
“Tun season second half-ah hian team tana belhchhahtu hlu tak a ni dawn tih hi ka chiang a, kan hmachhawp tihlawhtlin kan tumna kal mekah tha taka kan thawhho ka beisei.”
BBC Sport tarlan danin, England leh Europe chhunga club 18 vel zetin man loa lakluh theih a nih hun chhung reiloteah khan Sterling hi an ngaihven rual thup a, Netherlands lama kal a thlang ta a ni.