Season tawpa chhuak tur Silva

Manchester City chuan season tharah an player pawimawh pakhat Bernardo Silva an chhawr thei tawh dawn lo a, tun season kal lai tawp rual hian a chhuak ve tawh dawn tih Portugal international hian a nemnghet.
Kum 3i mi ni ve tawh Silva hian City tana kum kua a khelh chhungin Premier League title paruk leh Champions League trophy pakhat lakpuyi tawhin, Etihad Stadium-a player hlawhtling berte zinga pakhat a ni a; chute taka huhang nei lian ni mah se season tawp rual hian a contract neih lai a hmang zo ang a, free agent ni chungin a chhuak ve dawn ta a ni.
Assistant manager Pep Lijnders chuan FA Cup quarter-final match pakhata si li faia Liverpool an sawp hnu lawk khan Silva chhuah tur thu hi nemnghetin, Pep Guardiola hnuaia player pawimawh Silva hian kum 2017-a City a zawm hnu khan match 450 a khel tling tawh.
Bernardo Silva hi City chuan AS Monaco atangin pound maktaduai 43.5 (USD 57.35 million)-in an senglut a; a tactic daihzai lutuk, thiamna lama a chungchuanna leh chau ve thei lo ang hiala work rate a nihna hi Spanish coach hnuaia he midfielder tlaktlum chhan bulpuite a ni.