SEC-in MLA-te a kawm dawn

Mizoram MLA-te chu vawiin – June 5 hian Synod Executive Committee nen an inkawm dawn.
Tunhma atangin MLA thlantharte hi Synod Executive Committee (SEC) nen an inkawm ho thin a. Inpawh tawn takin lawmpuina leh rawtna, sawrkar thara beiseina an lo thlen thin. Kumin February-a SEC thutkhawmah khan inkawm ho tura ruahman a ni zet a, Assembly Session nen a innan avangin a hun sawnin June thla SEC thutkhawma inkawm an ti ta a ni.
Synod Executive Committee vawi 307-na hi Thawhlehni atang khan an thukhawm a, Ningani thleng a awh ang. Moderator Rev R Vanlalnghaka’n a kaihruai.
Tun tum SEC thutkhawma agenda 80 chuang chhawpchhuah zingah – fa lak (adoption) chungchanga inzirtirna siam rawtna, Pem Upa thlan nawnte certificate pek rawtna, Central KTP hruaitu thlan dan chungchang, Mizo Kutpui kan hman thin tha zawka hman rawtna, Synod pem hruaina 2017 en that, PRESCOM leh Synod Hospital dinhmun enthat tihte a tel.
Finance officer report-a a lan danin, April 2023- March 2024 chhunga Synod sum hmuh chu Rs. 3,95,07, 74,653 a ni a; Pastoral-ah Rs. 2,21,49, 26,750 leh Mission (Ramthar) ah Rs. 1,73,58, 47,903 hmuh a ni. Sawrkar kum kalta chhunga Synod sum hman chu Rs. 3,96,65, 83,734 a ni a, Pastoral-ah Rs. 2,44,13,97,979 leh Mission (Ramthar) ah Rs. 1,52,51, 85,755 hman a ni. Hmuhna lamah hian kum hmasa khumna Rs. 22,34, 98,245 a ni a, hmanna lama kum hmasa khumna Rs. 89,20, 03,334 a ni.
Kum kalta chhung khan bial hrang hrang thawhlawm thehluh atanga hmuh chu Rs. 3,69,67, 61,527 a ni a, hmun dang atangin Rs. 25,40,13,126 hmuh a ni.