SEC thukhawm mek

November 9-11 & 13 chhung hian Synod Executive Committee (SEC) vawi 303-na an thukhawm a. Synod moderator Rev Dr C Chawnghmingliana’n kaihruaiin, a tan ni – Nilaini khan secretary report leh finance officer report ngaihthlak a ni.
Secretary report-ah hian Synod puipaten Presbytery hrang hrangah inkhawmpui an hmanpui thu, kumin July 1-17 chhung khan moderator Rev Dr C. Chawnghmingliana leh senior executive secretary Rev C Zorammawia ten Presbyterian Church Wales General Assembly an hmanpui thu, kumin August 25-27 chhung khan Tuikual North Kohhran biak inah Harhna Inkhawmpui vawi 8-na hman a nih thu, Manipur buaina avanga harsatna tawkte tanpui nan sumfai Rs. 9420000 pek a nih thu, he buaina avanga Relief Camp-a awm mekte tana bungbel Rs. 500000 man leisak tura rel a nih thu, Pastor bial hrang hrang panga atanga silhfen leh mutbu dawnkhawm chu November 3 khan Churachandpur phurh thlen a nih thu te a tel a ni.
Tun tum SEC thutkhawmah hian agenda 107 ngaihtuah tura chhawp chhuah a ni a. Committee hrang hrang atanga agenda lut zingah Synod Higher Secondary principal tur thlan leh PC Girls headmistress ruat chungchang, inkhawm tihtlem chungchang zirchianna, Synod Pay Commission hmalakna, Synod Pension Dan 2014 enthat rawtna, Pathian Biak Inkhawm kalhmang zirchianna te a tel a. Presbytery atangin agenda engemawzat lut bawkin, chu’ng zingah chuan Kohhran Pavalai Pawl inkhawm hun inang tlanga neih rawtna, Kristian Hlabu-a hlate audio-a daha YouTube-a dah rawtna, kan rama ministry hrang hrangte zirchiana thawh ho dan kawng zawn thu, Synod Prison Ministry tihchangtlun rawtna, Synod Archives tihchangtlun rawtna, Central KTP hmalakna pakhat Youth Recreation Centre-a puitlin thuai theih nan Synod-in hmalakpui tura rawtna te a tel a ni.
Ruahmanna hmasaah chuan SEC thutkhawm hi November 7-9 chhunga neih tur a ni a. Mizoram MLA inthlanpui nen a innan tak avangin thutkhawm hun hi sawn tlai hret a ni.