SEDP-a beisei zat hmu lo te tang puihnaa puih tiam

MNF sawrkarin a intiam ang zat SEDP-ah a sem loh avangin, puihna hi sum hi lo dawng phawt a, Congress sawrkarah tang puihnaa puih zawm an nih tur thu Congress Mahila president Vanlalawmpuii Chawngthu chuan a sawi.
Congress Thalai Hqrs. huaihawta Inrinnia Luangmual Chhangurkawna street campaign neihah Mizoram Pradesh Mahila Congress Committee president chuan SEDP beisei leh dawn duh vanga MNF-a inziaklutte inthlahrung lo tura chahin, cheng nuai 3 sem tum ten cheng sing 5-a tlathlaa sem an tum mek chu lo dawng tura chahin, tang puihna hmanga an rawn chhunzawm sak tur thu a sawi.
Thiam taka chin leh chi inkara hem thlak thintu BJP chu, sawrkar duh luat avang leh sum duh lutuk avanga zawm mek leh zawm tum mek party-te pawh inlamlet a hun tawh tih a sawi a. Tunhnaia Mizoram BJP hruaituten Mizoram tualto party pakhatin BJP thawhpui an tum nia an sawi chu pawi an tih thu sawiin, “BJP hi kan hnam leh sakhaw himna’n kan tlansana kan hlat a ngai. Mizoram mipui leh kohhrana inhmangte hian eng party hi nge kan hnam leh sakhaw tana him tih pawh kan chhut thiam a hun tawh hle a ni,” a ti.
Hmeichhiate chu ram leh khawtlang hruai tura pawm loh thinna awm mah se, ram leh hnam vei tak tak, ram leh khawtlang siamtha tura thlantlin an lo awm tawh thin tih Vanlalawmpuii Chawngthu hian a sawi. “Hmeichhia kan nih avang hian ram kan hmangaih lo a ni loa, kan fel lo bik a ni lo; ram kan hmangaih ve tho. Congress party hi hmeichhiate tana reservation siamtu kan nih angin, hmeichhiate dinhmun sang zawka kan din theihna tura aw nei thei awmchhun chu Congress party chauh kan ni. Central-a Congress a sawrkar theihna’n Mizo hmeichhiaten Mizoram atanga bul kan tan a ngai,” a ti.