Sahimna zawnga Zoram pantute ruihhlo tawlh lo turin ngen

Excise & Narcotics hotute chuan thlakhat chhung an department hnathawhte thlirletin August 18 khan an thukhawm a. Hmanpuitu minister Er Lalrinawma chuan ram thenawm buai avanga Mizorama sahimna zawnga rawn lutte chu ruihhlo tawlh kawnga inhnamhnawih lo turin a ngen.
Excise & Narcotics assistant commissioner Peter Zohmingthanga chuan department-in Mizoram district hrang hranga thlakhat chhunga ruihtheih thil an man leh hnathawh dan report a pe a. Asst. commissioner dang T Lalramzauva chuan Aizawl district chuan Aizawl district bik hmalak dan leh hnathawh dan a report a, hmachhawpte a sawi bawk.
Minister chuan ruihlo dona kawnga thawktute inpekna leh thawhrimna chu a taka hmuin fakawm a tih thu sawiin, “Theihtawp kan chhuahna hian khawtlang leh chhungkuaah ruihhlo avanga harsatna tawk mekte tan chhanchhuah hna nasa takin kan thawk a ni tih hrereng ang u,” a ti. Ruihhlo dona kawnga theihtawp chhuahpui thintu NGO-te chungah pawh lawmthu sawiin, kan ram thenawm buaina avanga Mizoram lo pante leh awm mekte pawh ruihhlo tawlhna kawnga inhnamhnawih lo tur leh ruihhlo do kawngah thawktute tanpuitu ni zawk turin a sawm. District tina ruihhlo do kawnga sawrkarin Committee a dinte hmalak dan leh thawktute harsatna leh mamawh an thlente theihtawp chhuaha hma lakpui zel a ni dawn tih a sawi a ni.