SEDP chu sawrkarna an chang leh a nih chuan cheng nuai thum a tlin hma chu an sem chhunzawm dawn tih MNF senior vice president Tawnluia chuan a sawi a. SEDP hi vote zawnna atan an hmang lo tih a sawi.
MNF senior vice president sawi danin, MNF sawrkar flagship programme Socio-Economic Development Programme (SEDP) hi phase 1 installment hnih pek a ni tawh a, phase 2 hi installment khat pek ni tawhin, 3rd phase dawng tur an thlang tawh a, hemi atana sum mamawh pawh dah fel tawh a nih laiin, inthlan puanin a nang ta rih a ni.
“MNF-in sawrkarna a chang leh a nih chuan pek zui zel a ni dawn a, chhungkaw khatin nuai 3 an dawn kim hma chu pek chhunzawm a ni anga, a project azirin nuai 3 chuang pawh an dawng thei dawn a ni. MNF sawrkar chuan SEDP hmang hian kuthnathawktute leh miharsa zawkte leirem rah tir a, khaichhuah hi kan tum nghet tlat a ni,” a ti.
Sawrkar hna vuan ve lo mipui nawlpui harsa zawkte ban phaka budget hnuhhniam a ni chu lawmawm a tih thu Tawnluia hian sawiin, “Thenkhatin sawiselin demna thu aupui mah se, Mizoram budget, mipui hnen thleng pha a nih zia SEDP Family Oriented kalpui a ni hian a tilang a. Hei hian mipui ban phak sawrkar kan neih zia pawh a tichiang,” a ti.
SEDP pek chungchangah tih fuh tawk lo deuh engemaw a awm palh thei tih sawiin, SEDP dawn mamawh ngawih ngawih, la dawng lo emaw dawng tur thlan tawh, list-a tel lo palh emaw awm thei a ni a. Hengte dawn theih tur hian kimchang leh changtlung zawkin cheng nuai thum an dawn hma chu kalpui zel an tum tih a sawi.
MNF sawrkar tan tirhah SEDP hi pilot project atan chhungkaw 2000 chuang hnenah pek a lo ni tawh a, chhungkaw khatin cheng nuai 3 chuangte an dawng tih a sawi a. Hrileng buai avangin engemaw chen SEDP pek a khaihlak phah ta niin a sawi.
Zawhna chhangin, SEDP Executive Board chairman Tawnluia chuan SEDP chu a bikin thingtlanga chengten an chhawrin, kuthnathawktute leh harsa zawkte an lawm hle tih a sawi a. Vote zawnna atana an tih a ni loa, 2018 inthlan hma atanga an aupui tawh a, an intiam anga an kalpui tak a ni. An sem tawh chinah thenkhat, vaimim chin thlangtute ang chuan a zar an zo tan tawh laiin, trade dangah chuan a hlawhtlinna a lang hman chiah lo tih a sawi.
4SEDP 1st Phase-ah chhungkaw 60000 hnenah Rs. 50000 theuhin pek an ni tawh a, cheng vaibelchhe 300 sen a ni.
4SEDP 2nd phase-ah chhungkaw 60000 hnenah vek Rs. 25000 theuh pek leh niin cheng vaibelchhe 150 sen a ni.
4SEDP 3rd phase-ah chhungkaw 60000 tho target-in selection neih mek a ni.
4SEDP atan hian a vaiin cheng vaibelchhe 450 sen tawh a ni.
SEDP sem chhunzawm dawn Vote zawn nan kan hmang lo – Tawnluia
Get real time updates directly on you device, subscribe now.
Next Post