Selena Gomez- Woman of the Year

On Apr 28, 2025 66 0

Selena Gomez- Woman of the Year
2025 Billboard Latin Women in Music awards ceremony-ah inlan thei lo mah se Woman of the Year 2025 dawngtu Selena Gomez he award a dawn avanga a lawmthu video message-in a sawi.
Selena, kum 32, chuan a nuna a hun tam zawk mah chu hnathawkin, a hmeichhiat pui te hmuh tur leh support tura a awm thin thu a sawi a. “Ka seilennaah Mexican thisen kai ka ni hi zahpui lovin ka chhuang zawk a. Hmeichhe zinga stage leh thil tihna hmun dangah a lai lum luahtuah ka hmel anpui hmuh tur an tam lo thin. An vang riau a ni. Kan chanchin, kan kam chhuak leh culture te hian chawimawi a phu a ni,” a ti.
Selena chuan hetiang dinhmun a thlen theihna chhan chu a fan-te vang a ni thi a chiang a, “A pawimawh berah chuan ka fan-te hnenah lawmthu sen loh ka ba. Ka lawm e, ka lawm e, ka lawm e, ka thinlung chhungril ber atangin ka lawm a, ka hmangaih vek che u,” a ti bawk.
Selena Gomez hian 2017 khan Billboard Women in Music event-ah Woman of the Year hi a lo dawng tawh bawk. Chu chu a natna, lupus avanga kal thlak (kidney transplant) a neih hnu lawk a ni nghe nghe a. Khami tum khan a thiannu, kal petu Francia Raisa nen stage-ah inlanin, “Francia hi award dawng zawk tur a ni, ka nun min chhanhim saktu a ni si a,” a ti.
Rare Beauty founder Selena chuan, “Kan ûte, kawng min lo sial saktu te chungah lawmthu ka sawi a, anni awm lo se hetiang hi ka thleng tawp lo ang,” a ti bawk.
Kumin Billboard Latin Women in Music Award-ah hian Vanguard Award chu Anitta-in a dawng a, Legend Award chu Celia Cruz hnenah a thih hnuah hlan a ni a, Celia hi Queen of Salsa an tih thin a ni.
Chawimawina dang dawng zingah Belinda chuan Evolution Award a dawng a, Chiquis chuan Impact Award a dawng a, Natti Natasha-i’n Unstoppable Artist Award leh Olga Tanon-i’n Lifetime Achievement Award an dawng bawk.