Selesih- Sihphir kawng khar dawn

Durtlang Leitan to Sihphir inkar kawng thawmthat leh tih zauh hna thawh mekah chak zawka hna a kal theih nan Selesih to Sihphir section chu November 14 atang hian ni 25 chhung khar a ni dawn a, Lungdai to Aizawl kal tur tan kal dan tur ruahman a ni.
PWD ngenna angin helai kawng siam hna tha leh chak zawka thawh a nih theih nan kawngpui khar rih (complete road block) tha nia hriat a ni a. Aizawl SP chuan dan tlawhchhanin Selesih leh Sihphir inkar kawng 2023 November 14 atanga December 8 (ni 25 chhung) atana khar a ni tih tur thu hi thupek a tichhuak.
Kawng khar a nih chhung hian LMV leh a hnuailam tan lirthei kal dan dang (alternate road) ruahman a ni a. Aizawl to Lungdai lam pan tur tan Selesih kawn to Sihphir Kawnveng zawh tur a ni a. Lungdai lam atanga Aizawl lam pan tur tan Sihphir Arpu Veng (Rinchhan Veng) atangin Selesih kawna kal tur a ni.
Hnathawhna hmun paltlang lirthei veivak enkawl chu PWD/ company te mawhphurhna a ni a. Laklawh taka lirthei lian (heavy vehicle) hnathawhna hmun tarlan paltlang tum an awm loh nan Zanlawn, Bawngkawn leh Durtlangah hriattirna tar tur a ni. Hriattirna tar hi PWD/ company mawhphurhna a ni.
He thupek hian chhiatrupna thil, kangmei leh emergency kaihhnawiha duty, dan leh thupek pawimawh bika police leh magistrate duty-te leh emergency-a damlo hruaitute chetvelna a huam loa, thupek bawhchhia chu dan hmanga hrem theih an ni tih a sawi.