Sem policy ni lo, thawhrimna kan zuar – Lalduhoma

Sem policy ni lo, thawhrimna kan zuar
– Lalduhoma
ZPM chuan sem policy niloin thawhrimna an zuar a, Bana Kaih Policy hmangin mipui rilru puthmang siamthat an tum tih chief minister Lalduhoma chuan a sawi.
ZPM Zonu Hqrs-in Krismas urlawk an buatsaih a hmanpuinaah chief minister chuan, hun rei tak chhung ‘sem policy’ hmangin kan ram kaihhruai a ni tawh a, chu chuan kawng tam takin mipui rilru puthmang a dik lo zawngin a hruai nasa hle tih a sawi.
“Sem policy khan mi tam tak kutdawh rilru a put tir a, chu chuan ram mipui hmasawnna tur a tithuanawp nasa a. Kalphung thar mipui sawrkar chuan sem policy niloin thawhrimna kan zuar a, Bana Kaih Policy hmangin mipui rilru puthmang siamthat kan tum,” a ti.
Bana Kaih Policy hnuaiah entrepreneurship handholding, Chief Minister Special Package leh thlai thar lei kalpuiin hma an la mek a, ruahmana fel tak leh kalphung mumal tak hnuaiah lo chuan tih theih a ni lo, tiin, thlai thar lei chungchanga ruahmanna an siam pawh mipuiin lo ngaihven a, thawhrim rah duhawm tak seng turin kuthnathawktute duhsakna an hlan tih a sawi a ni.
ZPM chu opposition nih lai atang tawhin beihrawn an hlawh a, sawrkarna an chan hnuah pawh thudik tawk lo hmanga beih chhunzawm an la ni reng a, mipui tan thudik hriat hleihtheih loh khawpin beihna an tawk fo tih Lalduhoma hian a sawi. “Heng min beihna lo sepui ruah tawrh ngawt hi a fuh ber loa, mipui hnena thudik puanchhuah ve fo a tul. Min beitute hian dawt pawh an hmang hreh loa, thudik puanchhuah kawngah tan kan lak a tul hle,” a ti.
Kalphung thar mipui sawrkar a pian theihnan Zonuten tha an thawh hnem hle tih a sawi bawk.