Semi-final ah Djokovic leh Sinner

Ningani zan khan French Open 2025 mipa quarter-final khelh zawh a ni a, semi-final a inhmachhawn turin Novak Djokovic leh Jannik Sinner ten hnehna an chang. Djokovic leh Sinner te hian Zirtawp zanah final luh an inchuh dawn a, final ai maha hmuhnawm zawk theil hial tur ‘dream semi-final’ an khel dawn.
French Open-ah vawi thum champion tawh Novak Djokovic hian quarter-final-ah fiahna hautak a hmachhawn a, third seed Alexander Zverev nen an inhmachhawn. Australian Open semi-final-a a ngam loh Zverev lakah bul tan tha lo mah se tun hmaa Djokovic, huaisen leh tlo kha kan hmu nawn leh a, khingpui hautak tak lakah hnehna chang letin semi-final a lut.
Grand Slam-ah a vawi khan nan champion tuma tan khawh Zverev hian vawi 13 an inhmachhawn tawha vawi riat ngawt a hneh loh Djokovic lakah bul a tan tha a, set khatnaah break pawimawh tak neiin, game li hloh chungin set a la. Set khatna la mai bawk mah se set hnihnaah player huaisen, fing, thiam leh tlo Djokovic-a’n a zia a chhuah chho ta tak tak a, inhnehtawk taka inkhel in, inkhel hmuhnawm tak an lantir. Set hnihnaah hian Nole-a’n break a neih a chhawr tangkai ve leh ta thung a, game thum hloh chunga set lain, 1-1 a ni ta chiah.
Set khat a lak hnuin Djokovic a khel tha leh zual sauh a, set thumnaah a khingpui a awpbet chiang hle. Set thumnaah hian break a neih zawn vangin Serb hian game hnih chiah a hloh a, awlsam takin set a lak belh. Set hnih a hloh zawn vangin Zverev-a’n insiamthat a mamawh a, set linaah hnehna chan let ngei tumin thapui a thawh nasa hle. Set linaah hian inhnehtawk viau mah se hun pawimawh takah Djokovic a che fuh nawn leh a, break a neih chhawr tangkaiin set a la zui leh ta mai a, third seed Alexander Zverev lakah hian 4-6, 6-3, 6-2, 6-4 in hnehna a chang a, Grand Slam-ah a vawi 51 nan semi-final a lut.
Grand Slam-ah vawi 24 zet champion tawh a, mipa leh hmeichhiaah Grand Slam-a champion ngun ber leh Grand Slam a champion thei upa ber nih tuma hma lam pan mek Djokovic hian semi-final ah khingpui hautak zawk a hmachhawn a ngai dawn a, champion tura rinkai ber Jannik Sinner nen an inhmachhawn dawn. Novak Djokovic leh Jannik Sinner te hi an intumtawk thei hle a, vawi riat inhmachhawn tawhin vawi li ve ve an chak a, chungnung zawk an awm lo mek. Zirtawp zana chak zawk zawkin an inkarah 5-4 in hma an hruai dawn. An intum hnuhnung pathumah Sinner a chak vek a, semi-final ah hnehna changin a vawi khat nan French Open final luh theihna hun remchang a nei. Djokovic hian thil thleng tawh a thlen nawntir ngai lo viau a, a hma lawka a hneh loh em em pawh a hnu lawkah mak tih khawpin a hneh let leh mai thin. Vawi thum a hneh loh zawn tawh Sinner ngei pawh hi hneh lo turah a inngai hauh dawn lo.
Tennis player ropui ber Djokovic laka fiahna hautak hmachhawn turin Jannik Sinner hian quarter-final-a a khingpui Alexander Bublik 6-1 7-5 6-0 ngawtin a sawp a, phu tak leh rin aia awlsamin semi-final a inhlangkai ve bawk.