Serchhip-ah Addl District & Sessions judge court hawng

On Sep 20, 2025 2 0

Serchhip-ah Addl District &
Sessions judge court hawng
Serchhip District Court-a Additional District & Sessions judge Circuit Court chu Zirtawpni khan chief minister Lalduhoma’n a hawng. Thubuai lian zawk ngaihtuah thei Addl. District & Sessions judge, Serchhip-a a khat tawka a thut theihna tur hmun a ni.
Chief minister chuan, Circuit Court chu court sang zawk chhawp hnaihna, rang zawka court rorel kalpuina leh thubuai hmanhmawh thlak bik tana insawrbingna tangkai tak a ni a. A bikin NDPS case leh POCSO case tan a tangkai hle dawn tih a sawi.
“Kan ramah ruihhlo a hluar a, ruihhlo ngai an pung zel a, thubuai ngaihtuah tur pung ve zelin case pawh a lian tual tual emaw tih theih a ni. Serchhip district phei chu ram lailia awm, a ruka sumdawngten an paltlang nasat a ni a, Police leh Excise & Narcotics-in an man nasa thin. POCSO case pawh kan ngah viau a, heng case ngaihtuah theihna court sang zawk mamawhna hi a sang tual tual a ni,” a ti.
2024 November 25 khan Serchhip-a Circuit Court dinna tur hi sawrkar chuan notification a tichhuak a, Additional District & Sessions judge II Aizawl chu hmui tura tih a ni. Hun engngemaw chen an tichhin a, staff tlakchham vang leh court room mumal tak la awm loh avangin chawlhsan leh rih a ni. Kumin June atang khan inbiak hmuh theihna hmangin kalpui leh a ni a; tunah courtroom an nei ta a ni.
Mizoramah kum 2006 khan separation of judiciary puan a ni a. Serchhip District Court hi kum 2009-a kalpui tan a ni. Judicial magistrate first class-in a thutchilh phawt a. Court building hran ala awm loh vangin DC office-a room pakhat luah thin a ni. Kum 2014-ah chief judicial magistrate dah tan a ni a. DC office atang hian kum 2016-ah P&E Vengah an insawn a.
CJM hi district chhunga pawikhawihna thleng, kum 7 thleng hremna chin ngaithuah theihna court a ni a. Civil case pawh khawih theih a ni na in, case liantham, ‘session case’ kan tih ho – murder case, ND&PS case, pawngsual case, POCSO leh bail lamah anticipatory bail te khawih theih a ni thin lo. Additional District & Session judge court hawn a nih takah chuan session case pawh ngaihtuah theih a ni dawn. Additional District & Sessions judge-II Aizawl chuan a hmui dawn a, tuna he mawhphurhna chelhtu chu Julie Lalrinzami a ni.