Serchhip Darnam Vengah mi 72 eizawn theihna industry din tum

Serchhip Darnam Vengah mi 72
eizawn theihna industry din tum
Commerce & Industries director Maria CT Zuali chuan Nilaini khan Serchhip a tlawh a. District bawrhsap Paul L Khuma leh khawtlang hruaitute nen Darnam Tlanga din tum Serchhip Industrial Estate chungchang a sawipui.
Industries director chuan Serchhip district-ah Industrial Estate chawikanna tur project thehluh a ni dawn tih a sawi a. Revenue department nen an enho hnuah DIC Complex Darnam Tlang chu ‘industrial area’ a puan a, a hmun a zim avangin plug & play facility (flatted dactory) dah an rel tih a sawi. Darnam Veng mipuiin office sawn an phal loh chu sawifiahin, office laksak niloin, a aia changtlung zawk ruahmanna a ni tih khawtlang hruaitute a hrilh a ni.
Flatted factory hi building pakhata factory /unit tam tak awm theihna tur a ni a. Serchhip district pawhin flatted factory a neih ve ngei theihnan hma lak niin, Rs. 14,99,00,000 hu project siam a ni tih a sawi.
Serchhipa flatted factory complex hi square metre 2000 bial chhunga sak tum a ni a. Thil siamchhuahna hmun tur a nih angin kawtkai zau tawk awm tura duan a ni. Unit hrang hrang 24 tan hmun awl awm tura ruahman a ni a. Unit khatin mi pathum zel chhawr thei tura chhutin, heng industrial unit-ah hian mi 72 tan eizawnna a awm theih beisei a ni. Heng industrial unit hian a vaiin kum khatah sum chevel vaibelchhe thum bawr nei tura ngaih a ni bawk.
Thutkhawmah hian Sub Hqrs YMA Serchhip, Joint VC, Darnam VC-te leh official-te an tel a. Darnam khawtlang hruaitute hian an huamchhunga Industrial Estate awm tur hi a thuphungin an pawm. Darnam Venga cheng mipuiin a nih phung tur an hriatthiam theihnan vawiin – May 15 zing hian mipui kokhawmin inhrilhfiah a ni ang.