Serchhip veng fai ber Vengchung

‘Swachhata hi Seva’ denchhenin Serchhip khawpui chhunga veng/ village council fai leh thianghlimna lam kalpui dan endik a ni a, Vengchung VC chu fai bera thlan an ni.
Nilaina result puannaah Serchhip bawrhsap David Lalthantluanga chuan Swachta hi Seva hman chhungin faina lamah mipui leh sawrkar a luangchhuak a, faina beihpui an thlak a, hei hi faina hapta hman hun chhung chauh ni lo, kumkhuaa kalphung nise a duhawm hle tih a sawi. Mizoram chu state dang ngaihtuahin a fai viau rualin, hmabak erawh kan la ngah hle tih hria a tan lak zel a tul tih a sawi a. Serchhip chu khawpui fai tak, bawlhhlawh hmuh tur pawh awm mang lo khawpa fai a nih a, khawtlang hruaitu VC-te leh tlawmngai pawl, mipui mimirte an fakawm tih a sawi bawk.
Swachhata hi Seva hi India ram pumah September 15 atanga October 2, Mahatma Gandhi piancham thleng hman a ni a. Thupuiah “Garbage free India – bawlhhlawh awm lohna India” tih hman a ni. Serchhipah hian UD&PA hmalakna in faina beihpui thlak a ni a. He hapta hnih chhung hian Sesah kawr tihfai hna chu Govt. Serchhip College NSS-in a thawk a; DAY-NULM hnuaia self help group-ten Serchhip khawpui chhunga vantlang inthiarna zawng zawng an tifai a; Brilliant HSS leh Presbyterian English School New Serchhip ah hman khat daih plastic hmang lo tur leh bawhhlawh thliar tura inzirtirna kalpui a ni.
Swachhata hi Seva pualin Mizoram Cleanliness Week inbuatsaih nan Serchhip town huamchhunga village council-te tan fai inelna buatsaih a ni a. MJA Serchhip chuan October 5 & 6 khan endikin 1-na Vengchung VC hian lawmmanah sumfai Rs. 20000 an dawng a, 2-na Chanmari VC Rs. 10000, 3-na Hmar Veng VC leh P&E Veng VC ten Rs. 5000 ve ve an dawng a, citation an dawng theuh bawk.