Serchhipa ruihhlo tih tlem dan tur sawi

Tunhnaia Serchhip veng pakhata ruihhlo ngai nia rinhlelh thalai engemawzat a ruala vak, social media-a video darh (viral) avangin District Task Force on Ruihhlo Do Serchhip chu thutkhawm hmanhmawh koin an chairman, bawrhsap Paul L.Khuma hoin hmalak dan tur an rel.
Chairman chuan Serchhip khawpuiah thalai engemawzat ruihhlo bawihah an tang a, ruihhlo zuar ru engemawzat an awm nia a lan avangin tan lak nasat zual a ngai hle tih a sawi a. Reilote atan chauha ruihhlo tihrem a tawk loa, engtin nge a rem hlen theih ang tih ngaihtuah a pawimawh a. Chutihrualin, ni khat thilthua rel fel chi a nih loh avangin tun dinhmunah enge kan tih theih hmasak tih ngaihtuah a tul tih a sawi a ni.
Excise & Narcotics leh Police te hnathawh that avangin ruihhlo zuar engemawzat man an ni a, hei vang hian tunhnaiah ruihhlo a vang nia a lan thu bawrhsap hian sawi a, tha thlah loa tan la zel turin a fuih.
Sawrkara force mite bakah tlawmngai pawl leh kohhran tanhona a pawimawh tih thutkhawmah hian sawi a ni a. Serchhip addl SP Saidingliana Sailo kaihhruaiin Working Committee din nghal a ni a; Serchhip District Police leh Excise & Narcotics bakah a remchan dan angin YMA branch hrang hrang leh VDP te nen thawk ho a, hunbi neiin nasa lehzualin duty nise, tiin an rel. Ruihhlo ngaite kal tamna hmun nia ngaihah leh ruihhlo zuarte awmna hmun nia ngaih hmun thenkhatah ngawrh lehzualin duty nise, supply reduction-ah nasa lehzuala tan lak nise, an ti.
Bawrhsap chuan NMBA (Nasha Mukt Bharat Abhiyan) kaltlangin hma lak mek a nih dan a sawi a. Ruihhlo bawiha tangte hi tute nge an nih tih zawng chhuakin, an sim theih nana tanpui dan tur ngaihtuah an tum dawn tih a sawi a. Ruihhlo dona kawngah NMBA-in ruahmanna mumal tak a siam thu leh chak taka hma lak nghal a nih tur thu a sawi a ni.
Thutkhawmah hian Task Force member-te bakah kohhran hruaitute, Sub Hqrs YMA Serchhip, YMA Chhim Veng leh Kawnpui South branch, VC leh VDP aiawhte an tel a ni.