Serchhipah ui chhuah khap

Serchhip district-ah a neitu tel loa ui pawna chhuahtir khap a ni a. Thupek hian kumin December thla tir lam thleng a huam ang.
India leh Mizoramah faina leh hriselna lama hma sawn theihna turin sawrkarin chak takin hma a la a, Serchhip district-ah pawh mipuiin faina leh hriselna lama hma a sawn zel theih nan theihtawpa hma lak niin, hetih laia ui khuahkhirh loa khawlaia chhuah tir thin chuan khawtlang faina, himna leh hriselna a nghawng theih bakah khawtlang hmasawnna leh changkanna daltu a nih theih avangin district magistrate Paul L Khuma chuan Section 163 of Bharatiya Nagarik Suraksha Sanhita 2023 tlawhchhanin thupek a chhuah.
‘Mi tumahin midangte tana harsatna siam zawng leh midang tana hnawksakin ui an vulh tur a ni loa; ui vulhtuten khawlaiah an ui an chhuah zalen tur a ni loa, khawlaia an chhuahpui dawnin hrui/ chain rinawm tha taka hlingin an kai tur a ni. Ui vulhtuten an an ui vulh tha takin an khuahkhirh tur a ni a. Khawlaia ui tla leh a nghawnga hrui/ chain-a thlunna awm lo chu neitu awm lo anga ngaih a ni ang,’ a ti. Ui vulhtuten an ui vulhte zun leh ek khawlaiah an hnutchhiah tur a ni lo tih a sawi bawk.
He thupek hian thu leh awm hma chu chhuah a nih – October 10 atanga thla hnih chhung a huam dawn a. Thupek zawm lo chu Section 223 of BNS 2023 dan hmangin hrem theih an ni tih a sawi a ni.