Serena hnu lama Indian Wells title la thei naupang ber Andreeva

Serena hnu lama Indian Wells title la thei naupang ber Andreeva
Russian tleirawl kum 17 leka upa Mirra Andreeva chuan Pathianni Indian Wells final-ah 2-6, 6-4, 6-3-in world number one Aryna Sabalenka a hneh a, kum 1999 champion Serena Williams hnu lama women’s Indian Wells champion ni leh thei naupang ber a ni.
A career-a WTA 1000-level event title pahnihna a sualchhuah kawngah Andreeva hian top seed Sabalenka lakah bul a tan fuh lo a, set hmasa ber a hloh zet hnuah huaisen taka beiletin set hnuhnung pahnih a la zawn.
Kumin February thla khan Dubai-ah a WTA 1,000 level title hmasa ber a lo hlawhchhuak tawh a ni.
Kumin chhungin Belarusian lakah Russian Andreeva hi vawihnih a lo tlawm tawh a, hei vang hian Pathianni final-ah pawh Sabalenka kha rinkai zawk a ni lo thei lo a, mahse, set hnihna a lak hnuah inrintawkna thuk zawk nen Andreeva khan set thumna a khel leh a, tlawm zawk tura mi zawng zawng ngaih ni mah se ninth seeded Russian-in a career-a hnehna lian pakhat a hlawhchhuak leh ta a ni.
Inkhelh bana amah bawrtu chanchinbumite hnenah Andreeva chuan set khatna a hloh hnu khan a khelh dan thlakdanglam ngai a tih thu leh set hnihnaah a nawr nat tak thu a sawi.
Sabalenka hi California thlaler tournament-ah hian kum 2023 khan runner-up a lo ni tawh a, tunah champion zo loin pahnihna bawk a ni leh ta a ni.
Kum khat kalta atang khan Andreeva hian coach atan Conchita Martinez ruaiin, world number two lo ni tawh Martinez-i hnuaiah hian a zawnin top 10 player panga ngawt a hneh tling ta a; nikum khan Martinez-i hnuaiah hian Andreeva chuan French Open semi-final a thleng a, thla hmasa mai khan Dubai tournament-ah a champion a, WTA ranking-ah Russian hian top 10 hial a luah pha.
Indian Wells final a luhna kawngah pawh Andreeva hian he hmuna vawihnih champion tawh Iga Swiatek a hneh bawk a, hnehna a chan hnua thu a sawiah Russian tleirawl hian a coach Martinez hnen atanga thurawn a dawn thin dan sawichhuakin, “Inkhelh dan bakah tha khek dante min hrilh a, team tha takin min hual vel a, player tha tak tak laka ka him theihna’n min tanpui tha hle a ni,” a ti.
Tarlan tak angin, Andreeva hi Martina Hingis (1998) leh Serena Williams (1999)-te dawta Indian Wells women’s title la thei naupan dan indawta a pathumna niin, WTA Tour-a talent langsar berte zinga mi a ni mek.