Serial killer, Doctor Death tia sawi man leh

Serial killer, Doctor Death tia sawi man leh
Ayurvedic practitioner, serial killer hlauhawm tak ni zui ta, a mi thahte awle chaw atana pe thin nia sawi, Doctor Death tia an sawi chu nikuma chhuah lailawk a nih hnua a bik bo reng hnua Delhi Police-in an man leh ta tih Thawhlehni khan an sawi.
Mi thattu hi nihna lem hmangin Rajasthan-a Dausa-a sakhaw hmun, ashram-ah lo awmin Thawhtanni khan man a ni.
Kum 67 mi, Devender Sharma-a hi thuneitute chuan tualthah thubuai tam tak nei a ni tih an sawi.
Delhi, Rajasthan leh Haryana-a thubuai hrang hrang pasarihah thiam loh chantir niin dam chhung tang tura hrem a ni a. Gurgaon court chuan thi turin a lo ti tawh bawk.
Deputy Commissioner of Police (Crime Branch) Aditya Gautam chuan kum 2002 leh 2004 inkara taxi leh truck khalhtu eng emaw zat a thah avangin Sharma-a hi Tihar Jail-a dam chhung tang tura dah a ni tih a sawi a. August, 2023 khan parole-a chhuah a ni.
“Sharma hian a thurualpuite nen zin tur angin lirthei khalhtute hi an ko va, an that a, an lirthei chu an hralhsak leh thin,” tiin DCP Gautam chuan a sawi a. An mi thahte ruang hi finfiahna a bo vek theih nan Uttar Pradesh-a Hazara Canal, Kasganj-a awle tamna laiah an paih thin niin a sawi.
Officer hian Sharma hian dan bawhchhiatna a ngah hle a, mi thah, mi ruk bo leh mi rawk thubuai 27 vel a nei niin a sawi.
Pawi a khawih thin tih hi dan lova kal thlak a kalpui atanga hriat tan a ni a, hei hi kum 1995 leh 2004 inkara a tih thin a ni a. Amah hi BAMS (bachelor of ayurvedic medicine & surgery) degree nei niin kum 1984 khan Rajasthan-ah clinic a hawng a ni.
Police hnena a inpuan dan chuan dan lovin doctor leh mi dang kaltlangin state hrang hrangah kal 125 vel a thlak hman a ni.
Kum 1994 khan gas dealership neih a tumnaah a sum tam tak a hloh va, a hnuah gas agency lemah insiam lehin taksa peng hralhnaah a inhnamhnawih zui bawk.
Kum 1995 leh 2004 inkarah mi sual pawl dinin LPG cylinder phur truck an suam a, a khalhtute thatin an thil phurh an laksak thin a. Taxi pute a bitum leh a, an pawl hian taxi an hmang a, a khalhtu thatin an lirthei an hralh leh thin.
Sharma-ah hian mi 24 aia tam a thah ngei rin a ni.
Kum 2004 khan kal hralhna leh mi a thah thin avangin man a ni a. “Police chuan mi 50 chuang thatah ka ngai,” tiin DCP chuan a sawi.
Tun tuma chhuah lailawk a nih hma pawh hian chhuah a lo ni tawh a, hemi tum pawh hian a tlan bo zui tho.
January 28, 2020 khan ni 20 chhuah laklawk niin thla sarih zet a bik bo hnuah July-ah Delhi-ah man a ni a. June, 2023 khan Sarita Vihar police station-a thubuai a neihah thla hnih chhuah lailawk leh a ni a, hemi tum pawh hian August 3, 2023 atangin a bi bo tawh bawk.