Serie A lerah Inter Milan an kir

Serie A lerah Inter Milan an kir
Zirtawpni zanah sikhat faia Napoli hneh chungin Juventus-in Serie A table-ah hma an hruai zet a, Inrinniah sili faia Udinense sawp chungin Inter Milan chuan an hmahruaina an luahkir leh.
San Siro inkhela goal hmasaber hi minute 37-a Hakan Calhanoglu penalty chhuihluh niin, chawlhlawk dawnah inhnaih tak takin Federico Dimarco leh Marcus Thuram-te’n goal khat ve ve an thawh belh a, half time-ah mualneitu team hian sithum faiin hma an hruai phawt.
Inter goal lina leh he match-a goal hnuhnung ber erawh a fan ta deuh a, hun pangngai tawp hma minute ruk chiah awm tawha Lautaro Martinez-a goal kha season kal laia a league goal 14-na a ni tawh.
An kawtkaia a an point thum hlawhchhuah leh nen season kal laia league game 15 an khelh tawh atangin Milan club hian tum 12 hnehna an chang tling ta a; point 38 hum chungin anmahni hnaihbertu Juve lakah point hnihin an sang a, Inrinni inkhel danga Atalanta khelmuala 2-3-a tlawm AC Milan chuan pathumna luahin, hmahruaitu Internazionale lekah point kua ngawtin San Siro luahtu club pakhat zawk hi an hnufual tawh.
Serie A table-a an hmahruaina an neihkirlehna kawngah Nerazzurri chuan Inrinni game-ah khan Udinese an ham lo hle a; tan phat atangin an goal bawh a na nghal a, Serie A top scorer Martinez chuan goal ban tihper nghalin, a hnu lawkah Udinese keeper Marco Silvestri chuan pui takin Dimarco goal tur a dansak ve leh.
Mualneitu team lamin goal khung thei lawk lo mah se chawlhlawk hnaih lamah goal khung an tan a, Nehuen Perez chuan box chhungah Argentine Martinez titluin, hun rei fu video assistant referee (VAR) kaltlanga thil thlen dan endik a nih hnuah penalty ham a ni a, Calhanoglu chhuihlohna lama Silves-tri tlu chuan Inter goal hmasaber a hringchhuak.
Goal li dang thuntute tarlan a ni tawh a, an kawtkaia an point thum hlawhchhuah hmangin Inter-in Serie A hmahruaitu nihna an neilet leh.
Tarlan tawh angin, Inrinni league match dangah AC Milan an tlawm thung a, 2-2 a nih reng hu hun pekbelh minute 95-ah Luis Muriel-a goal an chhuah a, mualneitu Atalanta laka 2-3-a tlawmin, an tan Serie A title beiseina a chuai zel.
Tun kha league season kal laia Milan vawili tlawmna niin, Nilaini hian Champions League game khelin Newcastle United an luhchilh zui leh dawn a, knock out stage luh beiseina nei turin Stefano Pioli team hian chak ngei ngei an mamawh.