Serie A player naupang ber Francesco

Inrinni zan khan Italian club lian AC Milan chuan si khat faiin an mikhual Fiorentina an hneh. An mualah an chak tum hian rawlthar Francesco Camarda chuan hun tawp dawn hnaihah mual chhung a lut a. Kum 15, thla hnih leh ni 16 a upa Camarda hi Italian Serie A khel thei naupang a ni.
AC Milan hian San Siro-a an mikhual Fiorentina lakah minute 45’+2 a Theo Hernández penalty hmangin hmahruaina goal an thun. Harnandez goal thun hmang hian hnehna an chang a, an mualah point thum an hmu. Si khat faia hmahruai mek AC Milan tan rawlthar Francesco Camarda chuan minute 83-naah mualchhung a lut. Hun tawp dawn hnaia lut ni bawk mah se Camarda hian Serie A khel thei naupang ber record thar a siam tho thung.
Italian Serie A-ah player naupang ber ni thin chu Wisdom Amey a ni. Amey hian kum 2021 khan kum 15 leh ni 274 upa ni chungin Serie A khel thei naupang ber record a siam a. Kum hnih hnu lekah Francesco Camarda chuan Serie A record thar a siam ta a ni. Serie A khel thei naupang ber Camarda hi AC Milan youth team tan a khel tha viau a, seasson kal mekah vawi 13 khelin goal sarih a thun a, senior team tan khelin, record a siam ta hial a ni.
Inrinni zana inkhel dangah Napoli chuan 2-1 in Atalanta an hneh a, palinaah an inhlangkai. Pathianni zan khan Serie A khelh chhunzawm niin, team lian pahnih Inter Milan leh Juventus an inhmachhawn a, inkhel hmuhnawm takah 1-1 in an inhnehtawk. Mualneitu Juventus tan Dusan Vlahovic chuan minute 27-naah hmahruaina goal a thun a. Inter Milan tan season kal meka goal thun thei tak Lautaro Martínez chuan minute 33-naah goal thunin an si phurh a sut a, 1-1 in an inhnehtawk zui ta a ni. Juventus lakah tlawm an pumpelh vangin Inter Milan hian khelh 13 atanga point 32 hmuin hma an hruai chhunzawm a. Khelh 13 atanga point 30 hmu mek Juventus in pahnihna an luah ve thung.