Serie A title race chep zual sawt

Serie A title race chep zual sawt
Pathianniah sikhat faia Inter Milan an chak laiin an chung chiaha Serie A hmahruaitu Napoli chuan an kawtkaiah point hnih an hloh thung a, ti hian, khelh hnih chiah awm tawhah a sang pahnih hi point khat chauhin an inthlau ta.
Naples khaw team hian May ni 18 hian Parma an luhkhung ang a, ni sarih a liam leh rualin Cagliari an mikhual zui leh ang a, he match pahniha an chak ve ve chuan tunhnai kum thum chhunga a vawihnihna leh an club chanchina a vawilina atan Serie A title an chang dawn a ni.
An hmabak khelh hnih la awm zawha Napoli leh Inter point hmuh a inzat a nih chuan title-deciding play-off hmangin champion zawntir an ni ang.
Torino 0-2 Inter Milan
Thlipui leh ruahpui vanawn thawk chiam avangin Turin khaw inkhel half-time break hian darkar chanve zet a awh a; first half tir lamah pawh medical emergency avangin inkhel a sukuk tawh bawk.
Mikhual chakna goal hmasa zawk hi minute 14-na leka Nicola Zalewski goal pui tak niin, an goal hnihna erawh second half tir lam minute 49-a penalty atanga Kristjan Asllani chhuihluh a ni thung.
Referee Federico La Penna chuan Mehdi Taremi laka Torino keeper Vanja Milinkovic-Savic foul chu penalty-ah a ham a; a hnuah Milinkovic-Savic hian an lama lut tur tha tak taka danbeh a nei zui nual.
Karliamta kha Inter Milan tan chawlhkar duhthusam a tih theih a, a chhan pawh Thawhlehniah 4-3-a Barcelona hnehin khelh hnih belhkhawmah 7-6 hnehna changin Champions League final an lut a, kartawpah title race-a beiseina sang zawk nei turin hnehna an chang zui leh a, an elpui leh hmahruaitu ni bawk Napoli chak zawh loh nen a lo inrual lehzel bawk nen Inter ‘puja’ fuh lai tak a ni!
Napoli 2-2 Genoa
Pathianni Serie A inkhel dangah champion an tumna kawnga chak mamawh Napoli an talbuai tlat a, an mikhual team laka point hnih hlu tak hlohin, khelh hnih chiah awm tawhah point khat chauhin hma an hruai fal ta a ni.
He inkhelah hian English club pali – Chelsea, West Brom, Everton leh Manchester United thuam inbel tawh Inter striker Romelu Lukaku chuan Napoli hmahruaina khung bawk mah se Alex Meret ‘own goal’ avangin 1-1 a ni a; chu tah Giacomo Raspadori chuan second half laihawlah Napoli hmahruai nawnna goal thawh ve leh bawk mah se Johan Vasquez chuan Genoa siphurh a sut ve leh ta tlat a, an kawtkaiah point hnih hlu tak an hloh ta ringawt a ni!