Serkawnin zirlai titha chawimawi

YMA Serkawn Branch hnuaia Education & Library Committee chuan Serkawn khaw chhunga zirlai tithate chu Inrinni khan an chawimawi a. Bialtu MLA, Lunglei High Powered Committee vice chairman V Malsawmtluanga leh district education officer Lunglei K Lalrintluangi ten an hmanpui.
HPC vice chairman chuan Serkawn Sikulpui chu Zosapten an din leh mi hlawhtling tak tak lo zir chhuahna a ni, tiin, zirlaite chu vawiina an hlawhtlinna hi pen sang khat pen tura an pen khatna chauh a ni tih hria a, an zirlaiah leh an thil tihna kawng tinrengah Pathiana innghat tlat turin a chah.
Serkawn khaw chhunga zirlai ti tha mi 23 hnenah chawimawina thuziak leh thilpek hlan an ni a. Board exam-a zirlai hlawhtlinna chang, class-XII chin hnuailam chu kumin YMA Day – June 15 chawimawina an lo hlan tawh a. Tun tumah hian bachelor degree china zirlai hlawhtlinna chang 23 (mipa 7 leh hmeichhia 16) hnenah chawimawina hlan a ni a; an zinga mi 7 (mipa 1 leh hmeichhia 6) chu university level-a top rank holder an ni.