Service Review Committee

Nimina Mizoram Economic Association-in Aijal Club-a Mizoram Economic Summit 2024 an buatsaih hmanpuitu chief minister Lalduhoma chuan, Mizoram inrelbawlna kaihhnawih thil pawimawh tak tak a sawi a. Chu’ng zingah chuan, sawrkar hnathawk tlak lote dap chhuak a, atul anga bantir thlenga hmalatu tur Service Review Committee din a nih tur thu a tel a. He committee hi department tinah din tur a ni awm e.
Tunhma deuh khan, sawrkar department office-a thawk ve si, mahse an hna chanpual a nihna tur anga thawk hlei thei lo (damlohna leh thil dang vang pawh ni chiah lo, mimal inthunun theih loh vanga ‘fit lo’), an thawpui ten an awi nun tawk tawk ang chi kha an awm nual nia sawi a ni thin a.
Hetia ‘thawk tlak lo’ dapchhuah hna buaipuitu tur department tina Committee din a ngaih dan atang hian, tun thleng hian tunhma ami ang deuha sawrkar hna thawk tlak lo ‘unfit’ ang kha an la awm zel a nih ngei a rinawm a. Sawrkar hnathawk tlak leh thawk duh ngawih ngawih tam tak an awm laia sawrkar hna tithuanawp zawk hlauh an lo awm a nih chuan, tunhmaa ‘inngaihnathiamna’ ang kha, hmasawn zel tum tan chuan thlauhthlak ngam a hun ve tawh viau a ni.
Department hrang hrang hnuaia thawktu zingah, ram leh mipui venhim hna thawk tura rawih kan police force hrang hrangte hi abikin an intuaithar a pawimawh dawn hle a. Kan ram hruaitute pawhin an sawichhuak chamchi a, ruihhlo avanga buai hi kan police force zingah hian an awm thin tih chu zep thu a cheng lo. |halai sang rual fit tak tak, hnathawh chak em em an zik huai huai lai a, ram leh mipui venghimtu tur ber, mahni inthunun thei lo khawpa ruihhloin a tihbuai an awm thin a nih chuan, ram leh mipui himna tiderthawngtu an ni, tihna a ni a. Hetiang mi hi department hrang hrang hnuaiah pawh an awm maithei e; Service Review Committee hian an hna tur dik tak an thawh zar zar theih chuan, hmasawnna rahbi khat kan chuangkai leh dawn tihna a ni ang. Hma lam pan zel tur kan ni a, chutianga hma lam pana kal hlei thei lote chu, ‘lo chawl la, midangin an rawn thlak mai ang che’ kan intih deuh khawl khawl hi a hun tawh niin a lang.