Sessions Judge-in Serchhip tlawh
District & Sessions Judge Aizawl Judicial District Vanlalenmawia chuan Ningani khan Serchhip a tlawh a. Thuneitute nen an thutkhawm bakah District Court leh District Jail a enfiah.
Thutkhawm hmasa zawkah The Mizoram Victims of Crime Compensation (Amendment) Scheme 2016-in a sawi anga chhawmdawlna diltu case 10 chungchang ngaihtuah a ni a. Hemi ngaihtuahtu Committee-ah hian District & Sessions Judge hi chairman niin, Serchhip District Legal Services Authority member secretary Josangzeli Tlau chu secretary a ni. Member-ah Serchhip bawrhsap, SP, MHIP, MUP, YMA leh Serchhip District Consumers Union president theuh member an ni.
District & Sessions judge chuan The Mizoram Victims of Crime Compensation (Amendment) Scheme 2016 sawifiahin, he dan hnuaia chhawmdawlna dawn theih dan, pawihkhawihna thlen ni atanga chhiara chhawmdawlna dil theih hun chhung, chhawmdawlna sum leh pai dawn theih zat a sawi a. He danin a tum ber chu mi tupawh misual kut tawrh avanga ram tui leiloa an awmin emaw thihna an tawhin an chhungte hnenah zangnadawmna pek a ni a, he ruahmannna hian pawngsual tuarte pawh a huam a ni. Danin a sawi anga chhawmdawlna diltu mi pathum (POCSO hnuaiah 2, IPC Section 304A hnuaiah 1) te dilna chu a pawmsak a, 7 dang erawh court thutlukna a la chhuah loh avangin ngaihtuah that leh tur a ni.
Under Trial Review Committee chu District & Sessions judge kaihhruaiin neih chhunzawm a ni a. Bawrhsap, SP, tlawmngai pawl, Serchhip District Consumers Union, MHIP, MUP leh YMA president bakah District Jail superintendent chu member a ni. He Committee hian bailable case ni si, bail loh vanga jail-a tang engzat nge awm tih te; chargesheet thehluh hun tawh, hun bithliaha thehluh hman loh avanga jail tan hun tur aia rei tang an awm em, tih leh engzat nge chutiang mi chu awm tih te an thlir ho a. Serchhip district-ah an chungthu rel mek (under trial prisoners) 40, mipa 34 leh hmeichhia 6 an awm a; court-in thiam loh a chantir (convict) mi 25 an awm.
Aizawl, Kolasib, Serchhip, Mamit leh Saitual district bialtu District & Sessions judge Vanlalenmawia hian Serchhip District Court a enfiah bakah Judicial officers quarters leh Serchhip District Jail, Chhiahtlang chu a a tlawh bawk.