Shaboozey ‘A Bar Song (Tipsy)’ a Hot ber Billboard chart record a siam

Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart a kar thum a No.1-na a ni ta a, he hla hi Hot Country Songs chart-ah pawh a No.1 bawk a, mihang mipa zaithiam zingah Billboard Hot 100 leh Billboard Hot Country Songs chart-a a ruala No.1 ni khawp thei hmasa ber a ni a, mihang zaithiam zingah chuan a pahnihna niin, kumin tir lam khan Beyonce hla ‘Texas Hold ‘Em’ chu heng chart pahnihah hian a rualin a lo No.1 tawh a, Beyonce hi mihang zaithiam zinga heng chart pahniha a ruala No.1 ni thei hmasa ber a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Shaboozey ‘A Bar Song (Tipsy)’ hian kar khat chhungin stream maktaduai 37.3 leh sales 15,000 a nei thei a, radio airplay-ah pawh ngaithlatu maktaduai 85.1 a nei thei a, hei hi chart-ah a No.1 pui leh ta a ni.
Chart No.1 hlui Post Malone ‘I Had Some Help’ featuring Morgan Wallen chu No.2-ah bawk awm lehin, chart No.1 hlui bawk Kendrick Lamar ‘Not Like Us’ chu No.3-ah bawk a la awm a, Tommy Richman ‘Million Dollar Baby’ pawh No.4-ah bawk a la awm a, Sabrina Carpenter ‘Espresso’ pawh No.5-ah bawk la awmin, chart No.1 hlui Hozier ‘Too Sweet’ chu No.7 atangin No.6-ah a insawn thar leh a, chart No.1 hlui tho Sabrina Carpenter hla dang ‘Please Please Please’ chu No.6 atangin No.7-ah a tawlh ve thung.
Chart No.1 hlui Teddy Swims ‘Lose Control’ chu No.8-a bawk la awmin, he hla hi chart top 10-ah kar 28 a awm tling ta a, he chart top 10-a hla lang rei thei 10-na a ni ta.
Billboard Hot 100 chart top 10-a lang rei thei ber chu The Weeknd ‘Blinding Lights’ niin, kar 57 a lang thei a, The Kid Laroi leh Justin Bieber ‘Stay’ (44), Morgan Wallen ‘Last Night’ (41), Dua Lipa ‘Levitating’ (41), Harry Styles ‘As It Was’ (38), Glass Animals ‘Heat Waves’ (37), Taylor Swift ‘Cruel Summer’ (34), 24kGolden featuring iann dior ‘Mood’ (31), Miley Cyrus ‘Flowers’ (29), SZA ‘Kill Bill’ (28), Taylor Swift ‘Anti Hero’ (28) leh Teddy Swims ‘Lose Control’ (28) ten an dawt.
Chart No.2 pawh lo ni tawh Benson Boone ‘Beautiful Things’ chu No.9-ah bawk awm lehin, top 10 atanga chhuak tawh Chappell Roan ‘Good Luck, Babe!’ chu No.11 atangin No.10 a rawn kai thar ve leh ta bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More